Arslan.mn

АНУ-ын Ерөнхийлөгч Дональд Трамп Үндэсний сагсан бөмбөгийн холбооны (NBA) од Леброн Жеймсийг төрийн дуулал эгшиглэх үеэр зохисгүй үйлдэл гаргасан хэмээн шүүмжилж, уучлал гуйхыг шаарджээ.

Тодруулбал, аравдугаар сарын 20-нд Нью-Йорк хотын Мэдисон Сквер Гарден ордонд “Филадельфи 76” болон “Нью-Йорк Никс” багийн тоглолтын өмнө АНУ-ын төрийн дуулал эгшиглэх үеэр Леброн Жеймс гарын хөдөлгөөнөөр гольфын цохилт болон сагсан бөмбөг шидэх үйлдэл дуурайлган хийж буй дүрс бичлэг олон нийтийн анхаарлыг татсан байна.

Үүний дараа Дональд Трамп аравдугаар сарын 22-нд өөрийн Truth Social платформд уг бичлэгийг нийтэлж, Жеймсийг АНУ-ыг үл хүндэтгэсэн хэмээн буруутгажээ. Тэрбээр сагсан бөмбөгчнийг төрийн далбаа болон эх орныхоо төлөө амь үрэгдсэн цэрэг дайчид, баатруудаас уучлал гуйх ёстой гэж мэдэгдсэн байна.

Харин Леброн Жеймс уг шүүмжлэлд одоогоор олон нийтэд хариу мэдэгдэл хийгээгүй байна. Аравдугаар сарын 22-нд “Филадельфи 76” багийн талбайд болсон тоглолтын өмнө төрийн дуулал эгшиглэх үеэр тэрбээр толгойгоо бөхийлгөн зогссон тухай Associated Press агентлаг мэдээлжээ.

Леброн Жеймс энэ улиралд NBA-д 24 дэх жилдээ тоглож байгаа бөгөөд “Филадельфи 76” багт нэгдсэн анхны улирал нь юм. Тэрбээр өмнө нь улс төр, нийгмийн асуудлаар байр сууриа илэрхийлж, Дональд Трамптай хэд хэдэн удаа санал зөрөлдөж байсан билээ.