Монгол Улсын Ерөнхийлөгч У.Хүрэлсүх өнөөдөр боловсролын байгууллагуудын төлөөллийг хүлээн авч уулзсан.

Энэ үеэр Ерөнхийлөгч У.Хүрэлсүх Отгонтэнгэр их сургуулийн багш Ц.Алтанцэцэгт “Монгол Улсын Гавьяат багш” цолыг гардууллаа.

Түүний хувьд Боловсрол, хууль зүйн салбарт 50 гаруй жил, Отгонтэнгэр их сургуульд 30 жилийн турш багшилсан юм. 

УИХ-ын гишүүн, Сангийн сайд З.Мэндсайхан Гаалийн ерөнхий газрын дарга П.Дэлгэрнарантай тохиролцож, өөрийн ойрын хүмүүсээ Замын-Үүд дэх гаалийн газар, Хотын гаалийн даргаар тус тус томилжээ.

Өнгөрсөн долоо хоногт З.Мэндсайхан сайдын хүсэлтээр Улаанбаатар хотын гаалийн газрын цахим бүрдүүлэлтийн нэгдсэн төвд ажилладаг гаалийн улсын байцаагч Д.Ганбатыг Хотын гаалийн газраар томилох шийдвэр гарчээ.

З.Мэндсайхан нь өмнө нь сайдын суудлаа аваад удаагүй байхдаа авлигын хэргээр ажлаасаа халагдаж байсан алдарт уяач С.Дамбажавыг Замын-Үүд дэх гаалийн газрын даргаар томилуулж байв.

Гаалийн байгууллага нь Сангийн сайд асан Б.Жавхлангийн фракциар дүүрсэн байсан бол одоо З.Мэндсайхан сайдын хүмүүсээр сэлгээ хийж эхэлж буй нь энэ.

Гаалийн байгууллага даяараа хэн нь хэн бэ гэдгийг, ямар шат замаар явж буй, хууль журмаараа албан тушаал ахисан эсэхийг бүгд мэддэг. Тиймээс Улаанбаатар хотын Гаалийн даргаар томилогдсон Д.Ганбатыг албан тушаалын шалгуур хангаагүй мөртлөө томилогдсон гэх.

Үе үеийн сангийн сайдууд Гаалийн байгууллагыг өөрийн нөлөөллийн дохиур болгон ашиглах сонирхолтой байсаар ирсэн. Энэ ч утгаараа Сангийн сайд нь Гаалийн ерөнхий газрын даргадаа шахалт үзүүлэх, дотоод хүний нөөцийн бодлого, шийдвэрт нь нөлөөлдөг болжээ. Төрийн тусгай албыг үнэгүйдүүлэх, ашиг сонирхлоороо далдаас удирдах улс төрчдийн томилгоо цаашид үргэлжилсээр байх уу! 

Хотын гаалийн даргаар томилогдсон Д.Ганбатын  2024 онд АТГ-т мэдүүлсэн ХОМ-ийг хүргэж байна.

Тэрбээр мэдүүлэгтээ:

Өөрийн орлого: ₮66 сая
Гэр бүлийн орлого: ₮8,1 сая
Орон сууц барилга байгууламж: ₮478 сая /Нийтийн орон сууц-2/
Тээврийн хэрэгсэл: ₮115, сая /Lexus, RX 350 /
Мал аж ахуй: ₮0 сая 
Газар: ₮2 сая /Эзэмших-505м2-1, Эзэмших-509м2-1/
Үнэт эдлэл, урлаг, түүхийн үнэт зүйл: ₮0 сая
Хадгаламж: ₮13 сая 
Авлага:  ₮0 сая
Зээл:  ₮14 сая гэж мэдүүлжээ.

Энэ сарын 13-нд төвийн аймгуудын нутгийн баруун хойд хэсэг болон зүүн аймгуудын нутгийн зүүн хэсгээр бороо, дуу цахилгаантай аадар бороо орох тул болзошгүй үер ус, нөөлөг салхи, мөндөр, аянга цахилгааны аюулаас сэрэмжтэй байхыг анхаарууллаа. 

Нөөлөг салхи гэж юу вэ? 

Нөөлөг салхи гэдэг нь аянга, мөндөр, аадар бороо, цас зэрэг цаг агаарын үзэгдэлтэй холбоотой салхи огцом хүчтэй болох үзэгдэл юм. Нөөлөг салхины үед салхины хурд ихсэж 16 м/с-ээс их болох, 20-30 м/с-д хүрэх нь цөөнгүй. 40 м/с секундээс ч давсан тохиолдол бүртгэгдэж байжээ.  Нөөлөг салхи нь агаарын өгсөх урсгал буюу аянга цахилгаант аадрын үүл түүнээс үүдэлтэй цаг агаарын аюултай үзэгдэлтэй шууд холбоотойгоор үүсдэг аж. 

УИХ-ын хаврын ээлжит чуулганы хуралдаанаар Засгийн газраас өнөөдөр өргөн мэдүүлсэн Нийгмийн даатгалын ерөнхий хуульд нэмэлт, өөрчлөлт оруулах тухай хуулийн төслийг яаралтай горимоор хэлэлцэхээр боллоо.

Тухайн хуулийн төслийг Ерөнхий сайд Н.Учрал яаралтай хэлэлцүүлэхээр УИХ-ын даргад хүсэлт тавьсан байна. Нийгмийн даатгалын ерөнхий хуульд нэмэлт, өөрчлөлт оруулах тухай хуулийн төслийг хэлэлцэх санал хураалтад 98 гишүүн оролцож, 52 нь дэмжсэнээр яаралтай горимоор хэлэлцэхээр Хүний хөгжил, нийгмийн бодлогын байнгын хороонд шилжүүлэв.
 

Ерөнхий сайд Н.Учрал тус хуулийн төслийг өргөн мэдүүлэхдээ "1999 оноос хойш нийгмийн даатгалын шинэчлэлийн асуудлыг парламент, Засгийн газар хэлэлцэж ирсэн. Тухайлбал нийгмийн даатгалын багц хуулийн шинэчлэлийг Улсын Их Хурлаар хэлэлцэн 2024 онд баталсан ч тэтгэврийн шинэчлэлийн асуудлыг нэг мөр цэгцлэх зорилгоор Засгийн газраас уг хуулийн төслийг боловсруулсан.

Төслийг баталснаар тэтгэвэр авч байгаа 500 мянга гаруй ахмадад шимтгэл төлсөн хугацаанаас нь шалтгаалсан 100-300 мянган төгрөгийн нэмэгдэл олгох, 2013 оноос өмнө 1.4 сая төгрөгийн цалингаасаа тэтгэвэр тооцуулсан 140 мянган иргэдийг хамруулж, асуудлыг итгэлцүүрээр шийдэх зорилгоор 2.4 сая төгрөгийн цалингаас тэтгэврийг тооцож, зөрүүг арилгах бодлогын шинэчлэлийг хийнэ.

Нийгмийн даатгалын сангийн зарлагыг бууруулж, хамрах хүрээг өргөжүүлэн олон жил шимтгэл төлсөн нь өндөр тэтгэвэр тогтоолгох шударга тогтолцоо бий болгох зорилгын хүрээнд тэтгэвэрт гарах насаа хойшлуулсан жил тутамд дөрвөн хувийн нэмэгдлийг тооцох урамшууллын агуулгыг хуулийн төсөлд тусгасан.

Ажил олгогчийн төлөх нийгмийн даатгалын шимтгэлийн хэмжээнд хязгаар тогтоох, ажил олгогчийн төлөх үйлдвэрлэлийн осол, мэргэжлээс шалтгаалсан өвчний даатгалын шимтгэлийн хэмжээг бууруулах, гарааны бизнес эрхлэгчдийн ажил олгогчийн төлөх шимтгэлийг тодорхой хугацаанд чөлөөлнө.

Сайн дурын үндсэн дээр хуримтлалд суурилсан, хөрөнгө оруулалтын өгөөжөөр өсөх тэтгэврийн хуримтлал үүсгэх нөхцөлийг бүрдүүлэх, тэтгэврийн мөнгөн хуримтлал үүсгэх даатгуулагчид төрөөс тодорхой хугацаанд урамшуулал олгох, ажил гүйцэтгэх, хөлсөөр ажиллах болон тэдгээртэй адилтгах хэд хэдэн гэрээ байгуулан ажиллаж буй иргэдийн хөдөлмөр эрхлэлтийн онцлогт нийцүүлэн нийгмийн даатгалын шимтгэлийг уян хатан нөхцөлөөр төлөх боломжийг бүрдүүлнэ. 

Мөн анх удаа нийгмийн даатгалд хамрагдсан тохиолдолд тэтгэврийн даатгалын шимтгэлийн хөнгөлөлт үзүүлэх, ажил хөдөлмөр эрхэлж байгаа оюутан, суралцагчийг нийгмийн даатгалын зарим төрлийн шимтгэлээс чөлөөлж, ажлын байранд гараад шимтгэлээ нөхөн төлөх боломж олгоно" гэв.

Сүхбаатар дүүргийн 18 дугаар хороо, Дамбадаржаагийн эцсээс Бэлхийн авто зам хүртэлх авто замыг зургаадугаар сарын 12-ны 23:00 цагаас зургаадугаар сарын 15-ны 05:00 цагийн хооронд хааж, шинэчилнэ. Энэ хүрээнд нийтийн тээврийн Ч:29А, Ч:28 чиглэлүүд дараах замналаар явна.

• Зам хаах өдөр: 2026 оны 06-р сарын 12-ны 23:00 цагт хаана.
• Зам нээх өдөр: 2026 оны 06-р сарын 15-ны 05:00 цагт нээнэ.

Төрийн банк нь тогтвортой хөгжлийн зорилтуудыг хэрэгжүүлэх, ногоон төсөл, хөтөлбөрүүдийг бодлогын түвшинд дэмжих хүрээнд “Монголын финтек групп” ХК-тай хамтын ажиллагааны санамж бичиг байгууллаа. Хамтын ажиллагааны хүрээнд АНУ-ын Ногоон барилгын зөвлөлийн “LEED Gold Pre-certification” гэрчилгээтэй “NEOCITY” хотхон төслийг "Ногоон орон сууцны зээл"-ээр санхүүжүүлэхээр боллоо.

Энэхүү түншлэл нь ногоон барилга, эрчим хүчний хэмнэлттэй шийдлүүдийг нэвтрүүлэх, олон улсын байгууллагаас хөнгөлөлттэй эх үүсвэр татах, иргэдийн экологийн боловсролыг дээшлүүлэх замаар байгаль орчинд ээлтэй орон сууцны хүртээмжийг нэмэгдүүлэх зорилготой.

“Монголын финтек групп” ХК-ийн хэрэгжүүлж буй “NEOCITY” цогцолбор төсөл нь Хан-Уул дүүргийн 8-р хороонд 17.3 га газарт байрлах бөгөөд 2,400 айлын орон сууц, “Шинэ Монгол 3” сургууль, “Бяцхан Монгол” цэцэрлэг, эмнэлэг, худалдаа үйлчилгээ, спорт цогцолбор болон гүйлт, дугуйн замыг иж бүрэн шийдсэн хотхон. Энэхүү төсөл нь Монгол Улсад анх удаа орон сууцны барилгад байгаль орчинд ээлтэй, эрчим хүчний өндөр хэмнэлттэй шийдлийг нэвтрүүлж байгаараа онцлогтой.

Түүнчлэн талуудын хамтын ажиллагаа нь иргэдийг эрүүл, ая тухтай орчинд амьдрах боломжоор хангах, агаарын бохирдлыг бууруулах, ногоон орон сууцны хөгжилд бодит хувь нэмэр оруулах ач холбогдолтой юм.

Итгэл төгс - Ногоон ирээдүй Төрийн банк

ШУТИС-ийн Геологи, уул уурхайн сургууль, Өмнөговь аймаг дахь Технологийн дээд сургууль, Эрдэнэт цогцолбор их сургуулийн оюутнууд “Эрдэнэс Тавантолгой” ХК-ийн нүүрс баяжуулах үйлдвэр, техник, тоног төхөөрөмжийн ашиглалт, уурхайн өдөр тутмын үйл ажиллагаатай танилцлаа.

Ирээдүйн инженерүүдэд онолын мэдлэгээ уурхай, үйлдвэрлэлийн бодит нөхцөлтэй уялдуулан бататгах, мэргэжлийн ур чадвараа нэмэгдүүлэх ач холбогдолтой юм.

Нийслэлийн Засаг дарга Б.Пүрэвдагва Засгийн газрын хуралдаанд өөрийн удирдлагын багийн бүтэц бүрэлдэхүүнээ танилцуулж, батлуулжээ.

Энэ хүрээнд СДХ-ийн Засаг дарга Ц.БАТТӨРИЙГ төсөл хөтөлбөр хариуцсан удирдагчаар шилжүүлэн томилж, түүний орон НИТХ-ын төлөөлөгч Д.УНДАРМААГ томилхоор тохирчээ.

НИТХ-ын төлөөлөгч Д.Ундармаа нь Жижиг, дунд үйлдвэр, үйлчилгээг дэмжих төв НӨҮГ-ийн дарга, НИТХ-ын төлөөлөгч гэсэн ДАВХАР ДЭЭЛТЭЙ ажиллаж буй.

Тэгвэл СХД-ын Засаг даргаар томилогдож буй Д.Ундармаа төлөөлөгчийн 2024 онд АТГ-т шинэчлэн мэдүүлсэн ХОМ-ийг хүргэж байна. 

Тэрээр 2023 онд  24 сая төгрөгийн орлоготой гэж байсан бол 2024 онд буюу төлөөлөгч болсноор орлого нь 97 сая төгрөг болж нэмэгджээ.

Тэрбээр мэдүүлэгтээ:

Өөрийн орлого: ₮97 сая
Гэр бүлийн орлого:  ₮7 сая
Хөрөнгө борлуулсны орлого: ₮0 сая
Орон сууц барилга байгууламж: ₮66 сая үнэлгээгүй  /Орон сууц-1/
Тээврийн хэрэгсэл: ₮6 сая /Nissan, Teana/
Мал аж ахуй: ₮0 сая 
Газар: ₮142 сая  /Эзэмших-0.5012м2-1, Эзэмших-400м2-1, Эзэмших-700м2-2 нийт 4 ГАЗАРТАЙ /

Үнэт эдлэл, урлаг, түүхийн үнэт зүйл: ₮8 сая
Хадгаламж: ₮46 сая 
Авлага: ₮10 сая
Зээл:  ₮15 сая гэж мэдүүлжээ.

Монгол Улсын Хөгжлийн банк, Олон Улсын Валютын Сангийн Монгол Улсыг хариуцсан ажлын хэсэгтэй өнөөдөр (2026.06.12) уулзлаа. Уулзалтаар Хөгжлийн банкны өнөөгийн нөхцөл байдал, цаашид хэрэгжүүлэх бодлого, арга хэмжээний талаар мэдээлэл өгөв.
Дээрх ажлын хэсэг энэ сарын 10-23-ны өдрүүдэд төсөв, мөнгөний бодлогын чиглэлээр Сангийн яам, Монголбанк, Монгол Улсын Хөгжлийн банк болон холбогдох бусад байгууллагуудтай уулзалт хийж, эдийн засгийн дунд хугацааны төсөөллийг шинэчлэх, макро эдийн засгийн эрсдэл, эмзэг байдлыг үнэлэх зорилготой аж.

Дулаан болон цахилгааны суурь үнийг 5 увиар нэмэгдүүлэхээр боллоо.

Эрчим хүчний салбарын алдагдлыг бууруулах, үнийг бодит өртөгт ойртуулах зорилгоор дулаан болон цахилгааны суурь үнийг үе шаттайгаар нэмэх шийдвэрийг гаргажээ. Энэ хүрээнд эхний ээлжид таван хувиар нэмэгдүүлэхээр боллоо 

Иргэд зургадугаар сарын 5-аас эхлэн нэмэгдсэн үнээр дулаан болон цахилгааны төлбөрөө төлж эхэлнэв.

АНУ-ын Вашингтон хот дахь Монгол Улсын Элчин сайдын яаманд Цөлжилттэй тэмцэх тухай НҮБ-ын конвенцын Талуудын 17 дугаар бага хурал (COP17) болон Монгол Улсын санаачлан хэрэгжүүлж буй Тал хээрийн төлөвлөгөө (STEPPE Action Agenda)-ний талаар өндөр түвшний хэлэлцүүлэг зохион байгуулагдлаа. 

Арга хэмжээнд Монгол Улсын Засгийн газар, Олон улсын байгаль хамгаалах холбоо (IUCN), Дэлхийн банкны бүлэг, Даян дэлхийн байгаль орчны сан (GEF), Бэлчээр ба нүүдлийн мал аж ахуйн олон улсын жил (IYRP)-ийн Нарийн бичгийн дарга нарын газар, The Nature Conservancy (TNC) болон бусад байгууллагын төлөөлөл оролцжээ.

Энэ үеэр "Бэлчээрийн тэргүүлэх санаачилга, Ус-газрын нэгдсэн менежментийн санаачилга, Байгальд суурилсан шийдэл бүхий тогтвортой дэд бүтцийн санаачилга" зэрэг тэргүүлэх хөтөлбөрүүдийн талаар мэдээлэл өгч, олон улсын хамтын ажиллагаа, хөрөнгө оруулалтыг нэмэгдүүлэх уриалга дэвшүүлэв.

Хэлэлцүүлэгт оролцогчид газрын доройтолтой тэмцэх, бэлчээрийн экосистемийг хамгаалах, нөхөн сэргээх, орон нутгийн иргэдийн амьжиргааг дэмжих чиглэлээр хамтын ажиллагааг бэхжүүлэхийн ач холбогдлыг онцолж, Тал хээрийн төлөвлөгөөний хүрээнд хэрэгжүүлэх санаачилгуудыг дэмжих, хөрөнгө төвлөрүүлэх чиглэлээр хамтран ажиллахаар санал нэгдлээ.

Мөн 2026 оны наймдугаар сард Улаанбаатар хотноо зохион байгуулагдах Цөлжилттэй тэмцэх тухай НҮБ-ын конвенцын Талуудын 17 дугаар бага хурлыг амжилттай зохион байгуулах, түүний бодлогын өвийг бодит үр дүн, хөрөнгө оруулалт, урт хугацааны түншлэлээр баталгаажуулахын төлөө хамтран ажиллахаа талууд илэрхийлсэн байна. 

Зуны дэлгэр цаг ирж, иргэд амралт, аялал зугаалгаар хөдөө орон нутгийг зорих нь нэмэгддэг. Гэвч бидний хайрлаж очдог уул ус, гол мөрөн, ой хээрийн үзэсгэлэнт газрууд хүний үлдээсэн хог хаягдлаас болж өнгө төрхөө алдах болсон нь харамсалтай. 

Монгол Улсад жил бүр ойролцоогоор 2.2 сая тонн хог хаягдал үүсдэг бөгөөд үүний 1.4 сая тонн нь Улаанбаатар хотод ногддог байна.

Харамсалтай нь нийт хог хаягдлын ердөө 3-5 хувь нь л дахин боловсруулагдаж, үлдсэн ихэнх хэсэг нь хогийн цэгт булшлагддаг байна.

Судалгаагаар Улаанбаатар хотын ахуйн хог хаягдлын 52.8 хувь нь дахин боловсруулах боломжтой материал байдаг бөгөөд хуванцар хог дангаараа нийт хогны 14 хувийг эзэлдэг байна.

Хуванцар сав, гялгар уут зэрэг бүтээгдэхүүн байгальд хэдэн зуун жилийн турш задралгүй үлдэж, хөрс ус бохирдуулан, мал амьтан идэж хохирох эрсдэлийг бий болгодог.

Мөн олон улсын байгууллагуудын мэдээлснээр, Монголд үүсэж буй ахуйн хог хаягдлын 50 гаруй хувийг дахин боловсруулах боломжтой ч хог ангилан ялгах, зөв зохистой хаях дадал хангалтгүй хэвээр байгаа гэсэн судалгаа гарчээ.

Ялангуяа аялал жуулчлалын оргил улиралд голын эрэг, уулын бэл, үзэсгэлэнт байгалийн бүсүүдэд үлдээсэн ундааны сав, хүнсний сав баглаа боодол, нойтон салфетка, гялгар уут зэрэг хог хаягдал нь байгаль орчны доройтлыг улам нэмэгдүүлдэг аж.

Байгальд хаясан ганцхан хуванцар сав ч олон арван жил хэвээр үлддэг бол шилэн сав нарны гэрлийг ойлгон ой хээрийн түймэр гарах эрсдэл үүсгэх аюултай.

Тиймээс хөдөө аялалд явахдаа: 

• Авч очсон бүх зүйлээ буцаан авч явах, 
• Хогоо ангилан ялгаж зориулалтын цэгт хаях,
• Нэг удаагийн хуванцар хэрэглээг багасгах, 
• Гал түлсэн бол бүрэн унтраах, 
• Байгалийн ургамал, амьтны амьдрах орчинд сөрөг нөлөө үзүүлэхгүй байхыг хүн бүр эрхэмлэх шаардлагатай байна.

Өнөөдөр бидний үлдээсэн хог маргаашийн байгальд ачаа болдог. Харин өнөөдөр бидний гаргасан зөв дадал ирээдүй хойч үедээ цэвэр гол мөрөн, ногоон тал нутаг, онгон дагшин байгалийг өвлүүлэн үлдээх үндэс болно.

“Байгалиа хамгаалъя” аяны хүрээнд иргэн бүр аялсан газраа хоггүй үлдээж, дурсамжаа л авч буцъя. Цэвэр байгаль бол бидний хамтын хариуцлага юм шүү!!!

Улсын Нэгдүгээр Төв эмнэлгийн Нүд Судлалын Мэс Заслын тасгийн хамт олон АНУ-ын төвтэй Virtue Foundation-ийн эмч нартай хамтран 2026 оны 05 дугаар сарын 25-наас 06 дугаар сарын 02-ны өдрүүдэд эвэрлэг бүрхүүлийн эмгэгтэй нийт 42 эмчлүүлэгчид үзлэг, оношилгоо хийлээ.

Үзлэгийн үр дүнд хараа нь эрс буурч, эвэрлэг бүрхүүл шилжүүлэн суулгах мэс заслын заалттай 6 эмчлүүлэгчийг сонгон өндөр түвшний нарийн мэргэжлийн мэс заслыг амжилттай хийж, хараа сэргээх боломжийг бүрдүүлэв.

Тодруулбал,   3 эмчлүүлэгчид эвэрлэг бүрхүүлийг бүтэн давхаргаар нь шилжүүлэн суулгах мэс засал (Penetrating Keratoplasty – PKP),  3 эмчлүүлэгчид Эвэрлэгийн эндотелийн давхаргыг шилжүүлэн суулгах мэс засал (Descemet Stripping Endothelial Automated Keratoplasty – DSEAK) амжилттай хийжээ.

 Эдгээр мэс заслыг Virtue Foundation-ийн эвэрлэг, болрын мэс засалч Dr. Leela Raju, УНТЭ-ийн Эвэрлэг, болрын мэс засалч Т.Ундармаа нарын удирдлага дор Нүд Судлалын Мэс Заслын Тасаг, Мэдээгүйжүүлэг, Хагалгааны Нэгдсэн Тасгийн эмч, сувилагч, асрагч болон бусад мэргэжилтнүүдийн хамтын ажиллагааны үр дүнд амжилттай гүйцэтгэжээ.

Энэхүү хамтын ажиллагаа нь Монгол Улсад эвэрлэг бүрхүүлийн нарийн мэргэжлийн тусламж үйлчилгээг хөгжүүлэх, дэлхийн жишигт нийцсэн дэвшилтэт технологи, эмчилгээний арга барилыг нэвтрүүлэх, үйлчлүүлэгчдэд эх орондоо өндөр чанартай тусламж үйлчилгээг авах боломжийг өргөжүүлэхэд чухал хувь нэмэр оруулж байна.

 Мөн энэхүү үйл ажиллагааны хүрээнд Монголын эмч, мэргэжилтнүүдийн мэдлэг ур чадварыг дээшлүүлэх, олон улсын хамтын ажиллагааг бэхжүүлэх, цаашдын тогтвортой хөгжлийн суурийг тавихад онцгой ач холбогдолтой байлаа.

Хамтын ажиллагааг амжилттай хэрэгжүүлсэн Virtue Foundation-ийн эмч, мэргэжилтнүүд болон энэхүү үйл ажиллагаанд хүчин зүтгэл гарган оролцсон нийт хамт олондоо УНТЭ-ийн хамт олны зүгээс талархал илэрхийллээ.

Монголын хөгжмийн урлагт шинэ өнгө төрх, өвөрмөц мэдрэмжийг авчрах “Ethno Cinematic” тоглолт 2026 оны 6-р сарын 19, 20-ны өдрүүдэд Ulaanbaatar Theatre-т үзэгчдийн хүртээл болох гэж байна.

Энэхүү тоглолт нь Монголын язгуур урлаг, ардын хөгжмийн өвийг орчин үеийн симфони найруулга, electronic synth хөгжмийн элементүүдтэй хослуулан хүргэх ховор боломж байх болно. Анир Поп Оркестр-т зориулан тусгайлан найруулсан бүтээлүүд эгшиглэж, үзэгчдийг Монголын түүх, соёл, орчин үеийн урлагийн огтлолцол руу хөтлөх юм.

Тус тоглолтын онцлох үйл явдлын нэг нь алдарт “Хубилай Хаан” киноны хөгжмийг эгшиглүүлнэ.

Тоглолтын найруулагчаар Төрийн соёрхолт, МУГЖ Д.Сосорбарам, удирдаачаар МУУГЗ Б.Алтанхуяг ажиллаж байгаа бөгөөд 100 гаруй уран бүтээлч нэгэн тайзан дээр нэгдэн энэхүү томоохон бүтээлийг амилуулах болно.

Монголын соёлын өвийг орчин үеийн хэлээр хэрхэн өгүүлж болохыг мэдрэхийг хүсдэг бол энэ тоглолтыг алдаж болохгүй. Мөн Монголд ирсэн жуулчдад үндэсний урлагийг орчин үеийн тайзны шийдэлтэй хослуулан мэдрүүлэх ховор боломж болох юм.

Огноо: 2026.06.19–20

Байршил: Ulaanbaatar Theatre

Тасалбар: https://ticket.mn/event/3133 

Хууль зүй, дотоод хэргийн сайд С.Амарсайхан Бүгд Найрамдах Солонгос Улсын Сөүлийн өмгөөлөгчдийн холбооны Ерөнхийлөгч Жо Сүн Ёлийг хүлээн авч уулзлаа.

Уулзалтын үеэр Хууль зүй, дотоод хэргийн сайд С.Амарсайхан Монголын Өмгөөлөгчдийн холбоо болон Сөүлийн Өмгөөлөгчдийн холбоо хоорондын хамтын ажиллагаа өргөжин хөгжиж байгааг сайшааж, энэхүү хамтын ажиллагаа нь БНСУ-д оршин суугаа Монгол Улсын иргэдийн эрх, хууль ёсны ашиг сонирхлыг хамгаалахад бодит хувь нэмэр оруулж байгааг онцлон тэмдэглэв.

Өнөөдрийн байдлаар Бүгд Найрамдах Солонгос Улсад 60 гаруй мянган монгол иргэн оршин сууж, түүний дотор 20 гаруй мянган оюутан суралцаж байгааг дурдаад, тэдний эрх, хууль ёсны ашиг сонирхлыг хамгаалах, хууль зүйн туслалцаа, өмгөөллийн үйлчилгээний хүртээмжийг нэмэгдүүлэх асуудал чухал байгааг тэмдэглэлээ. Мөн энэ чиглэлд хоёр улсын мэргэжлийн байгууллагуудын хамтын ажиллагааны ач холбогдлыг онцлов.
Уулзалтаар талууд Монгол Улсын иргэдийн эрх, хууль ёсны ашиг сонирхлыг хамгаалах, эрх зүйн мэдээлэл, зөвлөгөөний хүртээмжийг нэмэгдүүлэх, иргэдийн эрх зүйн мэдлэгийг дээшлүүлэх асуудлаар ярилцав.
Сөүлийн Өмгөөлөгчдийн холбооны Ерөнхийлөгч Жо Сүн Ёлийн зүгээс БНСУ-д оршин суугаа Монгол Улсын иргэдийн эрх, хууль ёсны ашиг сонирхлыг хамгаалахад онцгойлон анхаарч ажилладгаа илэрхийлэв.

Түүнчлэн БНСУ-д суралцаж буй зарим монгол оюутнууд хууль, дүрэм журмын талаарх мэдлэг, мэдээлэл дутмаг байдлаас шалтгаалан гэмт хэрэг, зөрчилд холбогдох эрсдэл үүсдэг болохыг дурдаад, иргэдийн эрх зүйн мэдлэгийг дээшлүүлэх хүрээнд хууль зүйн мэдээлэл, зөвлөгөө өгөх үйл ажиллагааг үргэлжлүүлэн дэмжиж ажиллахаа илэрхийллээ.

Монгол Улсын Шадар сайд Н.Номтойбаяр БНХАУ-ын Зах зээлийн хяналт зохицуулалтын ерөнхий газарт ажиллаж, “Хэмжил зүйн салбарын хамтын ажиллагааны төлөвлөгөө”-г баталгаажууллаа.
Шадар сайд Н.Номтойбаяр өнөөдөр (2026.06.12) БНХАУ-ын Зах зээлийн хяналт зохицуулалтын ерөнхий газрын дарга Луо Вэнтэй албан уулзалт хийлээ.

Уулзалтын үеэр Монгол Улсын Стандарт, хэмжил зүйн газар, БНХАУ-ын Зах зээлийн зохицуулалтын ерөнхий газар хоорондын “Хэмжил зүйн салбарын хамтын үйл ажиллагааны төлөвлөгөө (2026-2029)”-г баталгаажууллаа.
Талууд 2025 онд Монгол Улсын Ерөнхийлөгч У.Хүрэлсүх БНХАУ-д хийсэн төрийн айлчлалын үеэр хэмжил зүй, тохирлын үнэлгээний салбарт хамтран ажиллах тухай Харилцан ойлголцлын санамж бичгийг байгуулсан бөгөөд уг санамж бичгийг бодит хэрэг болгоход идэвхийлэн ажиллахаа илэрхийллээ.
Шадар сайд Н.Номтойбаяр хоёр улсын эдийн засгийн хамтын ажиллагаа эрчимжсэнээр стандартын байгууллагуудын харилцаа, үйл ажиллагаа өргөжих бөгөөд Монгол Улсын Засгийн газраас Эдийн засгийн тусгай бүсийн тухай хуулийг боловсруулж байгааг дурдлаа.

Тус хууль батлагдсанаар хоёр орны худалдааны эргэлт нэмэгдэж, стандартчилал, итгэмжлэлийн салбар шинэ түвшинд хөгжих боломжтой гэв.
Түүнчлэн, Монгол Улс стандартын салбарт шинэчлэл хийхээр холбогдох хууль, эрх зүйн орчныг шинэчлэн найруулж байна. Уг хууль нь стандарт, цаг үеэ дагаад шинэчлэгддэг байх, зах зээл рүү уялдан чиглэсэн, олон улсын жишигт нийцсэн хууль байхаар зохицуулалтуудыг оруулж байгааг Шадар сайд онцлов.
Мөн хүнс, хөдөө аж ахуйн чиглэлийн Монголын аж ахуйн нэгжүүд бүтээгдэхүүнээ Эдийн засгийн тусгай бүсээр дамжуулан экспортлохоор хүлээж байгаа учраас хоёр улсын хооронд зурагдсан санамж бичиг, одоо зурагдаж буй төлөвлөгөөг нэн даруй ажил хэрэг болгох хэрэгцээ шаардлага байна гэлээ.

БНХАУ-ын Зах зээлийн хяналт зохицуулалтын Ерөнхий газрын дарга Луо Вэний зүгээс, цаашид стандартчиллын салбарт тогтвортой, байнгын механизм ажиллуулж, стандартын тухай мэдээллийг харилцан судалж, цаг тухай бүрд солилцох, мэргэжилтнүүдээ сургах хэрэгтэй байгааг тодотголоо.
Түүнчлэн хоёр улс чанарын баталгаажуулалтаа хангаж, худалдааны тарифын саадыг арилгах, мэргэжилтнүүдийн ур чадварыг дээшлүүлэх зэрэг асуудлуудыг шийдвэрлэхэд бэлэн буйгаа илэрхийлж байна.

Дотоод хэргийн их сургуулийн Эрдмийн зөвлөлийн тэргүүлэгчдийн ээлжит хуралдаан 06 дугаар сарын 11-ний өдөр болов.

Эрдмийн зөвлөлийн хуралдааныг тус зөвлөлийн дарга, доктор, бригадын генерал Т.Сүхболд даргалж, гишүүд 100 хувийн ирцтэйгээр оролцлоо.

Тус хуралдаанаар Их сургуулийн болон бүрэлдэхүүн сургуулийн эрдэм шинжилгээ, судалгааны ажлын тэргүүлэх чиглэлийг хэлэлцэн баталж, 2026-2027 оны хичээлийн жилээс эхлэн дагаж мөрдөхөөр тогтоов. 
Их сургууль, эрдэм шинжилгээний байгууллага нь Эрдэм шинжилгээ, судалгааны ажлын тэргүүлэх чиглэлийг албан ёсоор батлах, түүнийг тогтоосон хугацаандаа тогтвортойгоор баримтлах нь байгууллагынхаа хөгжлийг оновчтой залах, нөөцийг үр ашигтай хуваарилах зэрэг стратегийн өндөр ач холбогдолтой юм.

Бүгд Найрамдах Солонгос Улсын Ерөнхийлөгч асан  Юн Сүк Ёлд холбогдох ээлжит хэргийн шүүх хурал өнөөдөр /2026.06.12/ болж, Сөүлийн шүүх түүнд дахин 30 жилийн хорих ял оноолоо.

Шүүхээс тогтоосноор Юн Сүк Ёл нь 2024 онд Умард Солонгосын нутаг дэвсгэрт нисгэгчгүй нисэх төхөөрөмж (дрон) нэвтрүүлэх ажиллагааг зохион байгуулж, Солонгосын хойгийн хурцадмал байдлыг зориудаар нэмэгдүүлэх замаар тухайн оны арванхоёрдугаар сард онц байдал буюу цэргийн дэглэм тогтоох үндэслэл бүрдүүлэхийг оролдсон гэж үзжээ.

Прокуроруудын мэдээлснээр уг ажиллагаа нь хоёр Солонгосын харилцааг хурцатгаж, үндэсний аюулгүй байдалд эрсдэл учруулсан бөгөөд төрийн эрх мэдлийг хууль бусаар ашигласан үйлдэлд тооцогдсон байна.

Эргэн сануулахад, Юн Сүк Ёл нь 2024 оны цэргийн дэглэм тогтоох оролдлоготой холбоотойгоор энэ оны хоёрдугаар сард бослого, төрийн эсрэг гэмт хэрэг үйлдсэн хэрэгт буруутгагдан бүх насаар нь хорих ял сонсоод байсан юм. Ийнхүү өнөөдөр дроны ажиллагаатай холбоотой тусдаа хэрэгт дахин 30 жилийн хорих ял оноосноор түүний эсрэг гарсан шийтгэлүүд улам нэмэгдэж байна.

Юн Сүк Ёлын өмгөөлөгчид шүүхийн шийдвэрийг эсэргүүцэж, давж заалдахаа мэдэгдсэн байна.

Монгол Улсын Их Хурлын дарга С.Бямбацогтод өчигдөр /2026.06.11/ Улсын Их Хурлын гишүүн, Засгийн газрын гишүүн, Гэр бүл, хөдөлмөр, нийгмийн хамгааллын сайд Т.Аубакир Гэр бүлийн хөгжлийг дэмжих тухай анхдагч хуулийн төсөл өргөн мэдүүлэв.    

Монгол Улсад нийт 997 мянга орчим гэр бүл байдаг бөгөөд төрөөс гэр бүлийг бат бөх байлгахад дэмжлэг үзүүлэх зорилгоор хуулийн төслийг боловсруулсан гэдгийг салбарын сайд онцлов. Мөн Нийгмийн халамжийн тухай хууль тогтоомжийг шинэчлэх хүрээнд нийгмийн халамжийн үйлчилгээний хамрах хүрээг оновчтой болгон зорилтот бүлэгт чиглүүлж хүүхэд, эх, эцэгт олгох мөнгөн тэтгэмжийг хүн амын бодлогын арга хэмжээ гэж үзэж, нийгмийн халамжийн хөтөлбөрөөс хасаж хуулийн төсөлд оруулсан гэлээ.

Хуулийн төсөлд гэр бүлийг дэмжих үйл ажиллагааны хүрээнд мөнгөн дэмжлэг олгох, орон сууцны дэмжлэг үзүүлэх, ажил-амьдралын тэнцвэрийг хангах, гэр бүлийн боловсрол, эрүүл мэндийг дэмжих, нийгэм, сэтгэл зүйн үйлчилгээ үзүүлэх, эдгээртэй холбогдуулан төрийн болон орон нутгийн хэрэгжүүлэх чиг үүрэг, санхүүжилтийн асуудлыг зохицуулсан байна. Тодруулбал, хүүхэдтэй залуу гэр бүл, 3 ба түүнээс дээш хүүхэдтэй гэр бүл анх удаа ипотекийн зээлээр орон сууц худалдан авахаар зорилтот бүлгийн жагсаалтад орсон тохиолдолд тэргүүн ээлжинд хамруулах, улмаар ипотекийн зээлийн урьдчилгаа төлбөрийн 60 хүртэлх хувьд Зээлийн батлан даалтын сангаас батлан даалт гаргах зохицуулалтыг тусгасан байна.

Түүнчлэн гэр бүл, иргэдэд гэр бүлийн боловсролыг албан болон албан бусаар олгох, албан бус боловсрол олгох сургалтыг гэр бүлийн хөгжлийн цогц үйлчилгээний төв, насан туршийн суралцахуйн төвтэй хамтран зохион байгуулах, мэргэжлийн төрийн бус байгууллагаар гэрээлэн гүйцэтгүүлэх зохицуулалтыг төсөлд тусгасан байна.

Хуулийн төсөлтэй холбогдуулан Эх, эцэг, олон хүүхэдтэй өрх толгойлсон эх, эцэгт тэтгэмж олгох тухай хуулийг хүчингүй болсонд тооцох тухай, Олон хүүхэд төрүүлж өсгөсөн эхийг урамшуулах тухай хуулийг хүчингүй болсонд тооцох тухай,  Хөдөлмөрийн тухай хуульд нэмэлт, өөрчлөлт оруулах тухай, Шүүхийн шийдвэр гүйцэтгэх тухай хуульд нэмэлт оруулах тухай, Орон сууцны тухай хуульд нэмэлт оруулах тухай, Нийгмийн халамжийн тухай хуульд өөрчлөлт оруулах тухай, Авто тээврийн тухай хуульд нэмэлт оруулах тухай хуулийн төслийг тус тус боловсруулжээ хэмээн Улсын Их Хурлын Хэвлэл мэдээлэл, олон нийттэй харилцах газраас мэдээлэв.