Arslan.mn

БНХАУ-ын дарга Ши Жиньпин АНУ-ын Ерөнхийлөгч Дональд Трамптай есдүгээр сарын 24-нд Цагаан ордонд уулзаж, хоёр орны худалдаа, хиймэл оюун ухаан, Тайванийн асуудал болон олон улсын нөхцөл байдлын талаар хэлэлцлээ. Энэхүү уулзалт нь Ши Жиньпиний АНУ-д хийж буй төрийн айлчлалын гол үйл явдал болсон юм.

Уулзалтын үеэр хоёр тал АНУ, БНХАУ-ын харилцааг тогтвортой байлгах шаардлагатай гэдэгт анхаарчээ.

Ши Жиньпин хоёр улсын харилцаанд хамтын ажиллагааг гол байр суурь эзлүүлэхийн зэрэгцээ өрсөлдөөнийг зохистой хэмжээнд байлгаж, санал зөрөлдөөнийг удирдах шаардлагатай гэж онцолсон байна.

Худалдааны асуудлаар шинэ тохиролцоонд хүрчээ

Уулзалтын гол сэдвүүдийн нэг нь хоёр орны худалдаа, эдийн засгийн харилцаа байв.

Ши Жиньпиний хэлснээр, хоёр улсын эдийн засаг, худалдааны багууд шинэ шатны хэлэлцээ хийж, шинэ хамтарсан тохиролцоонд хүрсэн байна. Тэрээр үүнийг хоёр улсын бизнес эрхлэгчид, иргэд төдийгүй дэлхийн эдийн засагт эерэг мэдээ хэмээн тодорхойлжээ.

Харин Reuters-ийн мэдээлснээр АНУ-ын Сангийн сайд Скотт Бессент хоёр талын худалдааны түр эвлэрлийг дахин хоёр сараар сунгасан гэж мэдэгдсэн байна. Гэхдээ тариф, Хятадын худалдан авалт, газрын ховор элемент болон технологийн хязгаарлалт зэрэг маргаантай асуудлуудыг цаашдын хэлэлцээнд үлдээжээ.

АНУ, БНХАУ-ын технологийн өрсөлдөөний төвд байгаа хиймэл оюун ухаан мөн уулзалтын чухал сэдэв байв.

Ши Жиньпин хоёр улс хиймэл оюун ухааны салбарт өрсөлдөж байгаа хэдий ч энэ чиглэлээр хамтран ажиллах илүү их боломж бий гэж үзэж байгаагаа илэрхийлжээ.

Тэрээр AI-ийн эрсдэл, үр өгөөжийн талаар хоёр тал харилцан яриагаа үргэлжлүүлж, хиймэл оюун ухааныг буруугаар ашиглах, зүй бусаар хэрэглэхээс урьдчилан сэргийлэх шаардлагатай гэж мэдэгдсэн байна. Мөн AI технологи хүний хяналтад байх ёстойг онцолжээ.

Трамп ч мөн хиймэл оюун ухаан хүн төрөлхтний ирээдүйтэй холбоотой асуудал учраас АНУ, Хятад энэ чиглэлээр яриа хэлэлцээгээ үргэлжлүүлж, хамтын ажиллагаагаа нэмэгдүүлэх шаардлагатай гэж мэдэгдсэн байна.

Хоёр орны харилцааны хамгийн эмзэг асуудлуудын нэг болох Тайванийн асуудлыг мөн хэлэлцжээ.

Ши Жиньпин Хятад улсын үндэсний нэгдэл болон нутаг дэвсгэрийн бүрэн бүтэн байдлыг хамгаалах байр суурь тодорхой гэдгийг илэрхийлж, АНУ-ыг Тайванийн тусгаар тогтнолыг дэмжихгүй байх байр сууриа хадгалж, Тайванийн асуудалд болгоомжтой хандахыг уриалсан байна.