Arslan.mn

АНУ-ын Хууль зүйн яам болон TikTok, түүний толгой компани ByteDance нар хүүхдийн цахим нууцлалын тухай холбооны хууль зөрчсөн гэх хэрэгт 400 сая ам.долларын төлбөрөөр эвлэрч, олон жил үргэлжилсэн маргааныг эцэслэхээр тохиролцлоо. 

АНУ-ын Хууль зүйн яам 2024 онд TikTok болон ByteDance-ийн эсрэг нэхэмжлэл гаргаж, 13-аас доош насны хүүхдүүдийн хувийн мэдээллийг эцэг, эхийн зөвшөөрөлгүйгээр цуглуулж, хадгалсан гэж буруутгасан юм. Мөн эцэг, эхийн хүүхдийнхээ бүртгэлийг устгуулах хүсэлтийг зохих ёсоор биелүүлээгүй, 13-аас доош насны хүүхдэд хамаарахыг мэдэж байсан зарим бүртгэлийг устгалгүй хадгалсан гэх үндэслэл дэвшүүлжээ. 

Эвлэрлийн нөхцөлийн дагуу TikTok 300 сая ам.долларыг нэн даруй төлөх бөгөөд үлдсэн 100 сая ам.долларыг TikTok-ийн өмнөх платформ болох Musical.ly-тэй холбоотой 2019 оны зөвшөөрлийн захирамжийг хүчингүй болгосон шүүхийн шийдвэр гарсны дараа төлөхөөр болжээ.

Энэ нь АНУ-ын Хүүхдийн цахим нууцлалыг хамгаалах тухай хууль (COPPA)-ийн хүрээнд байгуулсан хамгийн өндөр дүнтэй эвлэрлийн хэлцлүүдийн нэг болж байна. 

АНУ-ын Хууль зүйн яамны дэд ерөнхий прокурор Стэнли Вүүдворд уг тохиролцоог “Америкийн хүүхэд, эцэг эхчүүдийн хувьд томоохон ялалт” хэмээн үнэлж, хүүхдийн цахим орчин дахь мэдээллийг хамгаалах нь яамны тэргүүлэх зорилтын нэг болохыг онцолжээ.