Arslan.mn

Астана. 2026 оны тавдугаар сар — Казахстан улс 2027 он гэхэд ОХУ-аас цахилгаан эрчим хүч импортлохоо бүрэн зогсоох зорилт тавиад байна. Энэ талаар тус улсын Эрчим хүчний дэд сайд Сунгат Есимханов албан ёсоор мэдэгдлээ.

Түүний хэлснээр, дотоодын эрчим хүчний шинэ эх үүсвэрүүдийг хугацаанд нь ашиглалтад оруулж чадвал ирэх оноос эхлэн импортын хэрэгцээ бүрэн арилна. Одоогийн байдлаар Казахстан улс цахилгаан эрчим хүчний тодорхой хэсгийг ОХУ-аас авч байгаа бөгөөд энэ нь дотоодын хэрэглээний өсөлттэй холбоотойгоор үүссэн хомсдлыг нөхөх зорилготой юм.

Албаны мэдээллээр, 2024 онд тус улсын цахилгаан эрчим хүчний хомсдол 2.1 тэрбум кВт.цаг байсан бол 2025 онд 1–1.5 тэрбум кВт.цаг болж буурчээ. Харин 2026 онд хомсдол 1–1.2 тэрбум кВт.цаг орчимд хадгалагдаж байгаа бөгөөд 2027 онд энэ үзүүлэлтийг “тэг” болгохоор төлөвлөсөн байна.

Энэ зорилтын хүрээнд Казахстан улс нийт 81 эрчим хүчний төсөл хэрэгжүүлж байгаа бөгөөд нийт хүчин чадал нь 15.3 гигаватт хүрэх юм. Эдгээр төслийн нийт хөрөнгө оруулалт 13 их наяд тенгед хүрч байгаа бөгөөд ихэнхийг нь 2027 оны эхний улиралд багтаан ашиглалтад оруулахаар төлөвлөжээ.

Казахстан нь сүүлийн жилүүдэд ОХУ-ын цахилгаан эрчим хүчний экспортын гол худалдан авагчдын нэг болоод байгаа юм. Тухайлбал, 2025 онд тус улс ОХУ-ын нийт цахилгаан экспортын 60 орчим хувийг дангаараа бүрдүүлсэн гэсэн тоо баримт бий.

Шинжээчдийн үзэж буйгаар, энэхүү бодлого нь Казахстаны эрчим хүчний аюулгүй байдлыг бэхжүүлэх, гадаад хамаарлыг бууруулах стратегийн алхам юм. Мөн бүс нутгийн эрчим хүчний зах зээлд тодорхой өөрчлөлт авчрах магадлалтай гэж үнэлж байна.