Arslan.mn

Ираны нутагт цэргийн цохилт өгсөнтэй холбогдуулан Шанхайн хамтын ажиллагааны байгууллагаас /ШХАБ/ мэдэгдэл гаргажээ. 

“Ойрх Дорнод дахь нөхцөл байдал болон Исламын Бүгд Найрамдах Иран Улсын нутагт цэргийн цохилтууд өгсөнтэй холбогдуулан ШХАБ-ын гишүүн орнууд гүнээ түгшиж буйгаа илэрхийлж байна” гэж тус байгууллагын албан ёсны мэдэгдэлд дурдаад зөрчил мөргөлдөөнийг тайван замаар зохицуулахыг уриалсан байна. 

“ШХАБ-ын гишүүн орнууд хүч хэрэглэхийг хүлээн зөвшөөрч болшгүй хэмээн үзэж байгаа бөгөөд үүссэн зөрчил мөргөлдөөнийг зөвхөн яриа хэлэлцээ, харилцан хүндэтгэх зарчимд тулгуурлан тайван замаар зохицуулахыг уриалж байна" гэжээ.

ШХАБ-ын зүгээс мөн олон улсын байгууллагуудад хандан арга хэмжээ авахыг уриалжээ.

“ШХАБ-ын гишүүн орнууд олон улсын энх тайван, аюулгүй байдлыг алдагдуулж буй үйл ажиллагааг таслан зогсоохын тулд яаралтай арга хэмжээ авахыг НҮБ, НҮБ-ын Аюулгүйн Зөвлөлөөс хатуу шаардаж байна" хэмээн дурджээ.