Arslan.mn

Японд нэгэн сэртхийлгэм хэрэг гараад байна. Энэ сарын 16-ны өдөр Япон Улсын Точиги мужийн Насу хотод хоёр хүн нас барсан байдалтай олдсон байна. Мөрдөн байцаагчдын өгсөн мэдээллээр “цогцсын гарыг хүлж, нүүрийг нь наалдамхай туузаар боож байгаад шатаасан нь урьдчилсан байдлаар тогтоогдсон” гэсэн юм. 

Уг хэргийг тодруулбал, 4 сарын 16-ны өдөр 08:00 цагийн орчимд цагдаагийн газарт "манекен шиг зүйл шатаад байна" гэсэн дуудлага мэдээлэл иржээ. Цагдаа нар дуудлагын дагуу очиход хэдийн гал унтарч, шатсан цогцос үлдсэн байжээ. Цагдаагийн газрын мэдээлснээр хохирогчдын нэг нь Токиогийн Тайто тойрогт оршин суудаг Рютаро Такаражима гэх 55 настай эрэгтэй  болох нь тогтоогдсон бөгөөд одоогоор түүний ажил мэргэжил тодорхойгүй байна. Харин нөгөө хүнийх нь хэн болохыг тогтоохоор ажиллаж байгаа гэнэ.

Энэхүү хэрэг гарсан газар Японы Насу хотын төвөөс зүүн өмнө зүгт 10 км-ийн зайд ууланд байдаг ба шалгалтын явцад тухайн газрын ойр хавиас амиа алдсан хоёр хүний ​​сууж явсан машин болон бусад тээврийн хэрэгсэл олдоогүй байна.