Arslan.mn

Нийгмийн даатгалын байгууллагаас жил бүр харьяа байгууллагуудад хяналт, шалгалт хийх төлөвлөгөө гарган ажилладаг ба 2025 онд хийсэн хяналт шалгалтын үр дүнд илэрсэн гэмт хэргийн шинжтэй зөрчлүүдийг хууль, хяналтын байгууллагуудад шилжүүлэн ажиллаж байна.

Цахим орчинд цацагдаад буй хуурамч бичиг баримт бүрдүүлэн тэтгэвэр, тэтгэмж тогтоосон гэх зөрчлүүдийг бид дотоод хяналт шалгалтын ажлын явцад илрүүлсэн ба хууль хяналтын холбогдох байгууллагуудад шалгуулахаар шилжүүлсэн.

Мөн хуурамч бичиг баримт бүрдүүлэн тэтгэвэр тогтоолгосон тухай зөрчил нь зөвхөн нийгмийн даатгалын салбарын ажилтны буруутай үйлдэл гэж ойлгож болохгүй юм. Тухайлбал, тэтгэвэр тогтоолгоход:

- Тушаалын хуулбар;

- архивын лавлагаа;

- шүүхийн шийдвэр гэх мэт бичиг баримтыг үндэслэдэг. Мөн бусад төрийн байгууллагаас ирүүлсэн хуулбар, лавлагаа, шийдвэрийг бид хүлээн авч ажиллах үүрэгтэй.

Дээрх бичиг баримтыг иргэд заримдаа хуурамчаар үйлдэн ирүүлэх тохиолдол бий. Хуурамчаар бичиг баримт бүрдүүлэн тэтгэвэр, тэтгэмж тогтоолгох нь хяналт шалгалтын явцад заавал илэрдэг ба үр дагавар нь эрүүгийн хариуцлага хүлээдэг тул иргэд та бүхнийг хууль зөрчсөн үйлдлээс ангид байж, залиланд өртөхгүй байхыг анхааруулж байна.

Иймд иргэд, даатгуулагч та бүхэн дээрх агуулгатай зөрчлийн талаар Нийгмийн даатгалын байгууллагын 7777-1289, 11328030- (304) дугаарт холбогдож мэдээлэл өгч, нийгмийн даатгалын хууль тогтоомжийг хамтран хэрэгжүүлж ажиллахыг хүсье.