ФОТО: Гадаадын хөрөнгө оруулагчдад мэдээлэл өгөх нэг цэгийн үйлчилгээний төв нээгдлээ
“Invest in Mongolia Center” нэг цэгийн үйлчилгээний төвийн нээлт өнөөдөр боллоо.
Гадаад харилцааны сайд Д.Цогтбаатар
“Монгол Улсад гадаадын хөрөнгө оруулалтын асуудал эрхэлсэн төрийн захиргааны байгууллага нь өнгөрсөн хугацаанд олон удаа бүтэц, зохион байгуулалтын өөрчлөлтөд орж, нэрээ сольсон байдаг.
Бүтцийн энэ тогтворгүй байдал нь Хөрөнгө оруулагчдад хүндрэл учруулж, үйл ажиллагаанд нь саад болдог гэдэг нь тодорхой юм. Иймээс цаашид байнгын, тогтвортой үйл ажиллагаа явуулах зорилго бүхий хөрөнгө оруулагчдад үйлчлэх “Нэг цэгийн үйлчилгээний төв”-ийг байгуулан, үйл ажиллагааг нь эхлүүлснээр хөрөнгө оруулалтыг хөхиүлэн дэмжихэд тодорхой ахиц авчирна гэдэгт итгэлтэй байна.
“Invest in Mongolia Center” нэг цэгийн үйлчилгээний төвөөс гадаадын хөрөнгө оруулагчид хууль эрх зүй, татварын орчны талаар мэдээлэл зөвлөгөө авах юм. Үүнээс гадна хөрөнгө оруулагчдад тулгарсан бэрхшээл гомдлыг хүлээн авах, хуулийн этгээдийн бүртгэл, лавлагаа, Монгол Улсын визний зөвшөөрөл олгох, сунгалт хийх, нийгмийн даатгалын бүртгэл, тайлан хүлээн авах зэрэг үйлчилгээ үзүүлнэ хэмээн Гадаад харилцааны яамнаас мэдээлэв.
Тус төв нь Засгийн газрын II байрны хойно байрлах Нэг цэгийн үйлчилгээний төвд байрлаж байна.
Эх сурвалж: Гэрэл зургийг:MPA.MN
|