Яг одоо төв талбайд Засгийн газрын хэрэгжүүлэгч агентлаг Соёл урлагийн газар хариуцан зохион байгуулж буй соёл урлагийн байгууллагуудын “Нээлттэй хаалганы өдөрлөг” болж байна. Өдөрлөгийн үеэр соёл урлагийн салбар байгууллагуудын явуулж буй үйл ажиллагааг иргэд олон нийтэд таниулах, шинээр нэвтэрч буй үйлчилгээ, цаашид хийгдэх ажлуудыг мэдээллэн, санал хүсэлтийг сонсох, салбарын хэмжээнд мөрдөгдөж байгаа хууль тогтоомжууд, дүрэм журмыг сурталчилж байна.

“Нээлттэй хаалганы өдөрлөг”-ийн үеэр Үндэсний төв номын сангаас номын сангийн тухай хуулийн талаар мэдээлж, “Үнэт ховор номын үзэсгэлэн”-г үнэ төлбөргүй үзүүлэхийн сацуу “Уран бичлэгийн хямдралтай үйлчилгээ” зэргийг үзүүлнэ. Харин Монголын үндэсний музейн хамт олон хорол, үйчүүр, алаг мэлхий, ардын уламжлалт тоглоомыг үзэгчдэд зааж сурган, тус музейгээс эрхлэн гаргасан ном зохиолыг сурталчилж, зарж борлуулж байна.

Мөн Улсын драмын эрдмийн театрын уран бүтээлчид энэ өдөр театрынхаа талаар мэдээллийг танилцуулж, театрын урын сангийн зарим тоглолтуудаас үзэгчдэд хүргэнэ. Тухайлбал, Д.Нацагдоржийн “Миний нутаг ” шүлгийг Улсын драмын эрдмийн театрын уран бүтээлчид уншиж сонирхуулах бол “Ану хатан” жүжгийн дууг СТА Ц.Баясгалан, “Макарена” ковер дууг Драмын гурав хамтлаг, Чингис хаан дууг Драмын дөрөв хамтлаг тус тус дуулж сонирхуулна.