Arslan.mn

МАН засгийн эрхийг авсны дараа өндөр настнуудад жилдээ хоёр удаа буюу сар шинэ, наадмын өмнө насны хишиг хүртээж байхаар болсон. Тодруулбал, ахмадуудад “Насны хишиг” тэтгэмж хүртээх хуулийг УИХ-аас өнгөрсөн онд баталсан билээ. Уг хуулийг дагуу сар шинээс өмнө ахмадуудад насны хишиг олгохоор болжээ. Хуульд ъ тэтгэмжийг 65-аас дээш насны ахмадад олгохоор заасан. Тухайлбал, 65-69 настай ахмад настанд 50 мянга, 70-79 настай ахмад настанд 80 мянга, 80-89 настай ахмад настанд 150 мянга, 89-ээс дээш настай ахмадад 250 мянган төгрөгийг олгох юм. 2017 оны төсөвт 20.5 тэрбум төгрөг суулгасан бөгөөд 122 мянга гаруй ахмад хишиг хүртэнэ гэсэн тооцоог салбарын яамнаас гаргажээ.

Дээрх болзол хангасан иргэд өнөөдрөөс иргэний үнэмлэхтэйгээ сум хорооныхоо нийгмийн халамжийн мэргэжилтэнд хандаж бүртгүүлэх юм байна. Тиймээс хэвтрийн өвчтэй, биеэр очих боломжгүй хүмүүсийн хүсэлтийг түүний итгэмжлэгдсэн төлөөлөгч, асран хамгаалагч нь гаргах аж.

Бүртгэлээ хийлгэсэн ахмадуудад Хаан банк, Төрийн банк, Капитал банкаар дамжуулан мөнгийг нь олгохоор болжээ. Түүнчлэн бүртгүүлсэн ахмадууд хоёрдугаар сарын 25, болон зургадугаар сарын 25-наас хойш банкинд очиж мөнгөө бэлнээр авах боломжтой юм байна.