Arslan.mn

Өнгөрсөн хоёрдугаар сарын 5-нд АТГ-ын мөрдөгчид Өмнөговь аймагт ажиллаж, тус аймгийн Засаг дарга Н.Энхбатын гэр болон албан өрөөнд нэгжлэг явуулан зарим эд мөрийн баримтуудыг хураан авсан байна. Тус нэгжлэгтэй холбоотойгоор Н.Энхбатыг саатуулаагүй хэдий ч Монгол Улсын хилээр гарахыг хязгаарлах, тодорхой хүнтэй уулзах, харилцах, харилцаа холбоо тогтоохыг хориглох хязгаарласан юм. 

Түүнийг багын найз Худалдан авах ажиллагааны газрын дарга Э.Ганхуяг, дүү Э.Очирхуяг, аав Т.Энхээ, Өмнөговь аймгийн Бүсийн дата төвийн дарга Б.Чинбат, ЗДТГ-ын Хөгжлийн бодлогын хэлтсийн барилгын салбар хариуцсан мэргэжилтэн М.Мөнхмаа нартай хамтран албан тушаалын байдлаа урвуулан ашиглаж, тендерийн үйл ажиллагаанд хууль бус нөлөөлсөн, авлига авсан байж болзошгүй хэрэгт холбогдуулан АТГ-аас шалгаж эхлээд буй.

Өмнөговь аймгийн Засаг дарга Н.Энхбат нь нэг хэсэг “Ажнай” Д.Бат-Эрдэнийн туслах ажиллаж байсан түүхтэй. Улмаар 2010 онд Өмнөговь аймгийн “Хаан банк”-ны захирлаар томилогдож, банкны захирал байхдаа Өмнөговь аймгийн ИТХ-ын төлөөлөгчөөр гурав дараалан сонгогдсон.

Ийн 2020 оны арваннэгдүгээр сард Өмнөговь аймгийн Засаг дарга Р.Сэддоржийн Уул уурхай, байгаль орчин, дэд бүтэц хариуцсан орлогч болж, 2023 оны тавдугаар сард Өмнөговь аймгийн ИТХ-ын төлөөлөгч, 2024 оны аравдугаар сард Өмнөговийн Засаг даргаар томилогдсон юм. Тэгвэл түүний хөрөнгө орлогын мэдүүлэгтэй танилцъя. 

Тэрбээр мэдүүлэгтээ:

Өөрийн орлого: ₮69 сая
Гэр бүлийн орлого: ₮48 сая
Хөрөнгө борлуулсны орлого: ₮0 сая
Орон сууц барилга байгууламж: ₮215 сая  /Орон сууц-1,  /
Тээврийн хэрэгсэл: ₮100 сая  / Жийп болон туулах чадвар өндөр,Lexus, RX 450- 1 /
Мал аж ахуй: ₮33 сая /Адуу-25, Хонь-18, Ямаа-41/
Газар: ₮30 сая /ЭЭзэмших-0.5га/
Үнэт эдлэл, урлаг, түүхийн үнэт зүйл: ₮82 сая
Хадгаламж: ₮53 сая
Авлага: ₮0 сая
Зээл:  ₮0 сая гэж мэдүүлжээ.