Arslan.mn

Хууль зүй, дотоод хэргийн сайд Х.Нямбаатар

-Өнөөдрөөс цахим гадаад паспорт олгох ажил албан ёсоор эхэлж байна. Анхны захиалгыг өгсөн иргэдэд өнөөдөр цахим гадаад паспортыг гардууллаа.

Цахим үндэстэн болох хамгийн том ажил бол энгийн гадаад паспортыг чиптэй, цахим болгон шилжүүлж буй үйл явдал юм. Зургадугаар сарын 1-ний өдрөөс эхлэн Чингис хаан нисэх онгоцны буудалд цахим гарц нэвтрүүлнэ. Ингэснээр иргэд гадаадад зорчих, эх орондоо ирэхдээ өнөөдрөөс олгож буй цахим паспортыг захиалж авснаар хүнтэй огт харьцахгүй цахим хаалгад паспортоо уншуулаад хилээр нэвтрэх боломжтой болно. Цаашид Монгол Улсын 37 боомтоос гурвыг нь эхний ээлжид цахим хаалгатай болгоно.

Шинэ паспорт 48 хуудастай. Хуудас нь төрийн тахилгат уул, улаан номд орсон амьтдын зурагтай. Нууцлалын бүх шаардлагыг хангасан тул зураг солих, нэр хуурамчаар үйлдэх зэрэг ямар ч боломжгүй.

Улсын бүртгэлийн бүх байгууллагаар цахим гадаад паспортыг олгож байна. Заавал шинэ паспортыг авах шаардлагагүй өмнөх паспортоо ашиглаж болно. Магадгүй, паспортын хугацаа нь дууссан бол энгийн болон цахим гадаад паспортоос өөрөө сонгоод захиалах боломжтой юм.