Arslan.mn

"Хөгжлийн банк”-ны гэх хэрэгт холбогдсон тус банкны гүйцэтгэх захирал асан Б.Батбаяр, Н.Мөнхбат, ТУЗ-ийн дарга Б.Шинэбаатар, Ерөнхийлөгч асанХ.Баттулга, УИХ-ын гишүүн Н.Алтанхуяг, Г.Амартүвшин, Ё.Баатарбилэг, Х.Ганхуяг, “Бэрэн групп”-ийн захирал Б.Мөнхтөр тэргүүтэй 80 хүн, дөрвөн аж ахуйн нэгжийн гэм буруутай, эсэхийг дэнслэх хурлыг өчигдөр хийхээр өнгөрсөн сард болсон урьдчилсан хэлэлцүүлгээр товлосон билээ.

Уг хэргийн шүүх хурал өчигдөр  “Улаанбаатар” чуулгын байранд эхэлсэн боловч  шүүгдэгч нар өмгөөлөгч авах хүсэлт гаргаж, шүүх хуралдааныг хойшлуулах санал шүүх бүрэлдэхүүнд хүргүүлснээр шүүх бүрэлдэхүүн зөвлөлдөөд дээрх шүүгчдэгч нарын хүсэлтүүдийг харгалзан үзэж, хурлыг дөрөвдүгээр сарын 17-ны 08.30 цагт хийхээр хойшлууллаа.

Улмаар эрүүгийн хэрэг хянан шийдвэрлэх ажиллагааны зорилтыг хангах үүднээс урьд нь хувийн баталгаа гаргах таслан сэргийлэх арга хэмжээ авхуулсан шүүгдэгч,

• ЗГХЭГ-ын дэд дарга, Хөгжлийн банкны ТУЗ-ийн дарга асан Б.Даажамба,
• гишүүн, БХБЯ-ны төрийн нарийн бичгийн дарга С.Магнайсүрэн,
• ЗГХЭГ-ын дэд дарга асан, Эрчим хүчний дэд сайд М.Баярмагнай,
• ЗТХЯ-ны Төрийн нарийн бичгийн дарга асан Б.Батзаяа,
• Сангийн яамны газрын дарга асан Ж.Үхэртар, Т.Оюунчимэг, О.Хуягцогт, Б.Найдалаа, Н.Баярчимэг,
• Хуулийн хэлтсийн захирал асан М.Золжаргал,
• хуульч Т.Пүрэвсүрэн, Б.Чинзориг, Г.Гантогтох,
• Энэ банкны Эрсдэлийн үнэлгээ, удирдлагын газрын мэргэжилтэн Д.Уянга, банкны ахлах мэргэжилтэн Л.Аззаяа, мэргэжилтэн Ц.Билгүүн,
• УИХ-ын гишүүн Г.Амартүвшин, Х.Ганхуяг, Ё.Баатарбилэг, Н.Алтанхуяг,
• Ерөнхийлөгч асан Х.Баттулга,
• “Мон-Ус” ТӨҮГ-ын ахлах мэргэжилтэн Ц.Баярсайхан,
• “Пирамид орд” ХХК-ийн захирал Г.Цолмон, Г.Санжмятав,
• ЗТХ-ийн болон ХХААХҮийн дэд сайд асан Ж.Бат-Эрдэнэ,
• Ерөнхийлөгчийн Тамгын газрын дэд дарга асан Г.Байгалмаа,
• "НВЦ"ХХК-ийн хамаарал бүхий этгээд Б.Цэрэндаваа,
• УИХ-ын гишүүн Ё.Баатарбилэгийн хамаарал бүхий этгээд болох Ё.Доржсумъяа,
• Монголбанкны ерөнхийлөгч Б.Лхагвасүрэн гэсэн 32 шүүгдэгчид улсын ХИЛЭЭР ГАРАХЫГ ХЯЗГААРЛАХ арга хэмжээ нэмж авчээ.

Бусад 40 шүүгдэгчид өмнө нь авсан уг таслах сэргийлэх арга хэмжээг хэвээр үлдээсэн байна.