ЗГХЭГ-ын дарга Б.Энхбаяр, БХ-ийн сайд Д.Батлут,ХЗДХ-ийн дэд сайд Д.Мөнх-Эрдэнэ нар өөрийн хүсэлтээр огцрох өргөдлөө өгчээ

Батлан хамгаалахын сайд Д.Батлут албан тушаалаасаа өөрийн хүсэлтээр чөлөөлөгдөх шийдвэр гаргаснаа арваннэгдүгээр сарын 13-нд мэдэгдээд байсан.
Тэгвэл өнөөдөр ЗГХЭГ-ын дарга Б.Энхбаяр, Хууль зүй, дотоод хэргийн дэд сайд Д.Мөнх-Эрдэнэ нар мөн өөрийн хүсэлтээр чөлөөлөгдөх өргөдөл өгсөн гэдгээ мэдэгдлээ.
ХЗДХ-ийн дэд сайд Д.Мөнх-Эрдэнэ энэ талаар "Дэмбэрэлцэрэнгийн Мөнх-Эрдэнэ миний бие Хууль зүй, дотоод хэргийн дэд сайдаас чөлөөлөгдөх хүсэлтээ өнөөдөр Монгол Улсын Ерөнхий сайдад гаргалаа.
Цаашид Улсын Их Хурлын гишүүн Л.Оюун-Эрдэнэ, Д.Амарбаясгалан, Нийслэлийн Засаг дарга бөгөөд Улаанбаатар хотын Захирагч асан Х.Нямбаатар тэргүүтэй Монголын ард түмний баялгийг хулгайлсан гэмт хэргийн бүлэглэлтэй тууштай тэмцэж, Монгол төрийг авлигачдаас цэвэрлэх үйлсэд хүч хавсран зүтгэх болно" хэмээн цахим хуудсаараа дамжуулан мэдэгдэв.
Үндсэн хуульд зааснаар Ерөнхий сайд Засгийн газрын гишүүнийг УИХ болон Ерөнхийлөгчид танилцуулснаар чөлөөлнө.


