Arslan.mn

Үндэсний аудитын газар 2026 оны гуравдугаар сарын 23-нд "Төрийн орон сууцны корпораци" ТӨХХК-ийн 2025 оны санхүүгийн нэгтгэсэн тайлан, төсвийн гүйцэтгэлд аудит хийж, "ХЯЗГААРЛАЛТТАЙ ДҮГНЭЛТ" гаргасан байна.

Тодруулбал, аудитаар нийт 23,9 тэрбум төгрөгийн зөрчил илэрсэнд, 14.5 сая төгрөгийн 1 төлбөрийн акт, 1,7 тэрбум төгрөгийн хариуцлага тооцох албан шаардлага, 21,6 сая төгрөгийн 8 албан шаардлага хүргүүлж, 427 сая төгрөгийн 2 зөвлөмж өгчээ.

Нийт илрүүлсэн алдаа, зөрчлөөс 23 тэрбум төгрөгийн зөрчил нь аудитын тогтоосон 217 сая төгрөгийн материаллаг байдлын түвшнээс их байгаа тул “Хязгаарлалттай” дүгнэлт өгчээ.

Тухайлбал,

• Гүйцэтгэх захирлын  тушаалаар ажлаас чөлөөлөхдөө Сангийн Яам, Авлигатай тэмцэх газрын шаардлага хангаагүй, сахилгын шийтгэлтэй ажилтанд хууль зөрчин сургалтын төлбөрт 3,5 сая төгрөг, 3 сарын цалинтай тэнцэх хэмжээний тэтгэмж 10 сая төгрөг, нийт 14 сая төгрөгийг олгож, байгууллагад хохирол учруулсан байна.
• Гүйцэтгэх захирлын тушаалаар ажлаас чөлөөлөгдсөн нэр бүхий ажилтанд  47 сая төгрөгийн цалингийн нөхөн олговор олгосон нь өмнөх аудитаар өгсөн 68 сая төгрөгийн албан шаардлагыг хэрэгжүүлээгүй, зөрчлийг давтан гаргасан.
• Олон жилийн насжилттай 2014-2016 онд үүссэн 20 аж ахуйн нэгж байгууллагатай холбоотой 1,4 тэрбум  төгрөгийн авлага, 378 сая төгрөгийн 15 аж ахуйн нэгжтэй холбоотой өглөг нийт  1,7 тэрбум мянган төгрөг байна.
• Гэрээ байгуулан сургалтын төлбөр төлсөн боловч, сургалтын үр дүнг тооцсон ажлын тайлан байхгүй, гэрээ дүгнэсэн актгүй 25 сая төгрөгийг зарцуулан байна.
• ТУЗ-ийн хурлын зардлаас 5,1 сая төгрөгийг хоол, рестораны зардалд төлж, төсвийг үрэлгэн зарцуулсан.
• Шатахууны тайланг гаргахдаа 10 сая төгрөгийн шатахууны зарцуулалтын тооцоо бодож, тайлан гаргаагүй.
• Элэгдлээрээ анхны өртгөө нөхсөн 71 ширхэг, нийт 416 сая төгрөгийн хөрөнгийн үнийг шинээр тогтоож, ашиглалтыг сайжруулах саналыг хүргүүлэх арга хэмжээ авч ажиллаагүй.
• Түрээслэгч иргэдтэй байгуулсан гэрээний дагуу түрээслэгчийн нэр тус бүрээр сар бүр авлага үүсгэж, тооцоог хянаагүй, нийт дүнгээр 13 сая төгрөгийн түрээсийн авлагыг бүртгээгүй зэрэг ЗӨРЧЛҮҮД ИЛЭРЧЭЭ.

Ташрамд дурдахад, Данхар бүтэцтэй ч хийх ажилгүй "Төрийн орон сууцны корпораци" ТӨХХК-ийн Гүйцэтгэх захирлаар

• 2025-02-20-нд Э.Тамир 
• 2025-07-22-нд А.Молор
• 2025-12-02 Б.Лхагваочир нар буюу нэг жилийн дотор гурван удаа зхирал нь солигджээ.