Arslan.mn

Долоо хоногийн өмнө Сөүл хотын Итэвон дүүрэгт болсон эмгэнэлт явдлын дараа Өмнөд Солонгосын эрх баригчид хүмүүс олноор бөөгнөрдөг газруудад тавих хяналтаа нэмэгдүүлж эхэлжээ.

Аравдугаар сарын 29-ны орой шөнийн амьдралаараа алдартай Итэвонд олон арван мянган хүн Сүнсний баяр тэмдэглэхээр цуглахдаа бага орон зайд шахалдсаны улмаас 150 гаруй хүн бусдад гишгэгдэж, амьсгаа боогдож нас барсан юм.

Энэ өдөр Сөүлийн оршин суугчид гурван жилийн дараа анх удаа цар тахлын хорио цээрийн дэглэмгүй баярлахаар цугларсан байв.

“Оргил ачааллын үеэр метроны өртөөнүүдэд өмнөхтэй ижил өндөр эрсдэлтэй нөхцөл байдал үүсэж болзошгүй” тул цагдаагийн хүчийг дайчлах болсноо Өмнөд Солонгосын ерөнхий сайд Хан Дүк Со өчигдөр мэдэгджээ.

Баасан гарагаас Сөүл хотын метроны өртөөнүүдэд цагдаа нар зорчигчдын бөөгнөрлийг хянах, зохицуулах ажил гүйцэтгэж эхэлсэн байна.

Мягмар гарагт тус улсын үндэсний цагдаагийн газрын тэргүүн, генерал Юн Хэ Кюн албан хаагчид нь ослын үеэр эрсдэлээс сэргийлэх арга хэмжээ авч чадаагүйг хүлээн зөвшөөрсөн юм. Хэрвээ зохих арга хэмжээг авч чадсан бол хохирлын хэмжээ бага байх байсныг мэргэжилтнүүд дүгнэж байгаа.

Долоо хоног үргэлжилсэн үндэсний гашуудлын хугацаа Бямба гарагт өндөрлөж байгаа.

Үүнтэй зэрэгцэн ерөнхийлөгч Юн Сүк Ёлын засгийн газрын эсрэг жагсаал зохион байгуулж байсан иргэний хөдөлгөөнийхөн өнөөдөр орой Итэвоны ослын хохирогчдод хүндэтгэл үзүүлэх зултай цуглаан зохион байгуулахаар төлөвлөжээ.

Итэвоны ослын үеэр 156 хүн амь үрэгдэж, 187 хүн бэртсэн юм. Бэртэж гэмтсэн хүмүүсийн 33-ынх нь биеийн байдал хүнд, эмнэлэгт эмчлүүлж байгаа. Амиа алдагсдын 26 нь дэлхийн 14 улсын харьяат, гадаадын иргэд байжээ.