Arslan.mn

"Бадамлянхуа Иог Төв"-ийн иогийн багш Б.Туулын зөвлөгөөг хүргэж байна.

Тэрбээр " АУРА САЙТАЙ ХҮНИЙ НУУЦ ЮУ ВЭ? 

Нэг их царайлаг ч биш, яриа хөөрөө сайтай ч биш атлаа нэг л өөр, бидний анхаарлыг татдаг хүн байдаг шүү дээ. Дэргэд нь байхад тайван, дулаахан санагдаж, дахин уулзмаар, ярилцмаар бодогдоно. Өөрийгөө онцгой харагдуулах гэж огт хичээгээгүй хэрнээ бусдаас ялгарч, сэтгэлд үлддэг.

Бид ийм хүнийг “аура сайтай хүн” гэж ярьдаг.

Би олон жил иог зааж, янз бүрийн нас, мэргэжил, амьдралын түүхтэй хүмүүстэй ажиллахдаа нэг зүйлийг анзаарсан. Хүн зөвхөн гадаад төрхөөрөө бус, дотроо юу тээж явдгаараа орчиндоо нөлөөлдөг юм байна.

Аураг заавал нүдэнд харагдах гэрлэн бүрхүүл гэж ойлгох албагүй. Хүнийг тойрсон тусгай энергийн талбай шинжлэх ухаанаар бүрэн нотлогдоогүй ч бид бусдын харц, нүүрний хувирал, дууны өнгө, амьсгалын хэмнэл, биеийн хэлэмжээс маш их мэдээллийг өөрийн мэдэлгүй хүлээн авдаг. Өөрөөр хэлбэл, аура гэдэг нь тухайн хүний дотоод ертөнцөөс гадагш мэдрэгдэж буй оршихуйн өнгө аяс байж болох юм.

Аура сайтай хүн ихэвчлэн өөртөө итгэлтэй байдаг. Гэхдээ бусдаас илүү гэдгээ харуулах гэсэн бардам итгэл биш. Өөрийнхөө давуу болон сул талыг хүлээн зөвшөөрч, хэн нэгэнд таалагдахын тулд дүр эсгэх шаардлагагүй болсон хүний тогтуун итгэл юм.

Тийм хүний дэргэд хүмүүс өөрийн эрхгүй тайвширдаг. Атаархал, уур бухимдал, үл итгэлцлийг дотроо тээж яваа хүн түүнийгээ нуухыг хичээсэн ч харц, хөдөлгөөн, дууны өнгөөрөө илэрхийлчихдэг. Харин өөртэйгөө эвлэрсэн хүн бусдад аюулгүй, дулаан мэдрэмж төрүүлнэ.

Аура сайтай хүн үргэлж инээж, ямар ч асуудалгүй амьдардаг гэсэн үг биш. Харин хүнд үедээ ч гомдол, бухимдалдаа бүхэлдээ авталгүй, амьдралын сайн сайхныг олж харах чадвартай байдаг. Түүний үг бусдыг мохоох биш, сэргээдэг. Инээмсэглэл нь ч дүр эсгэлтээс бус, амьдралд итгэх итгэлээс нь төрдөг.

Мөн юунд зориулж амьдарч байгаагаа мэддэг хүний харц, алхаа, хөдөлгөөн хүртэл өөр байдаг. Зорилго гэдэг заавал өндөр албан тушаал, их мөнгө байх албагүй. Хэн нэгнийг хайрлах, үр хүүхдээ зөв өсгөх, өөрийн ажлаар бусдад хэрэгтэй байх ч амьдралын том зорилго мөн.

Гэхдээ биеэ туйлдуулж, сэтгэлээ байнга дарж, нойргүй явдаг хүн дотроосоо гэрэлтэхэд хэцүү. Сайн унтаж амрах, зөв хооллох, хөдөлгөөн хийх, амьсгалаа ажиглах, өөртөө чимээгүй цаг гаргах нь гаднах арчилгаанаас дутахааргүй чухал.

Аура болон харизм хоёрыг бас ялгаж ойлгож болно. Харизм бол бусдын анхаарлыг татаж, нөлөөлөх чадвар. Харин аура нь тухайн хүний дэргэд бидэнд ямар мэдрэмж төрж байгаатай илүү холбоотой. Хүн хүчтэй харизмтай атлаа хүйтэн, дарамттай санагдаж болно. Харин эерэг ауратай хүн юу ч яриагүй байсан бусдыг тайвшруулж, дулаацуулдаг.

Тэгвэл аурагаа хэрхэн сайжруулах вэ?

Юуны өмнө талархаж сур. Өөрт байгаа зүйлээ анзаарч, чин сэтгэлээсээ “баярлалаа” гэж хэлэхэд бидний анхаарал дутагдаж буй зүйлээс амьдралынхаа дүүрэн тал руу шилждэг.

Өдөрт хэдхэн минут ч болов амьсгалаа ажиглан чимээгүй суу. Байгальд алхаж, нарны гэрэл, салхийг биеэрээ мэдэр. Өөртөө хэлдэг үгээ ч анзаараарай. “Би чадахгүй, би азгүй” гэж байнга бодвол тэр мэдрэмж харц, хөдөлгөөнд хүртэл шингэнэ. Харин “Би хичээж байна, суралцаж байна, даван гарч чадна” гэж өөрийгөө дэмжихэд дотоод хүч аажмаар сэргэдэг.

Хамгийн чухал нь өөрийгөө уучил. Өнгөрсөн алдаагаа өдөр бүр дахин шүүж, өөрийгөө шийтгэсээр байвал хүн өөрийнхөө сайхныг ч мэдрэхээ больдог. Уучилна гэдэг алдаагаа зөвтгөх биш. Харин ойлгож, сургамж аваад цааш явах эрхийг өөртөө өгөх юм.

Хүн үнэтэй хувцас, өндөр албан тушаал, бусдын магтаалаар гэрэлтдэггүй. Өөрийгөө хүлээн зөвшөөрч, бусдад хайр, хүндэтгэлтэй хандаж, амьдралаа утга учиртайгаар авч явж чадсан үед тэр гэрэл өөрийн эрхгүй харц, үг, үйлдэл бүрээс нь мэдрэгдэж эхэлдэг.

Аура бол нэг өдөрт бий болдог ид шид биш. Бидний өдөр бүр юу бодож, ямар үг хэлж, өөртөө болон бусдад хэрхэн хандаж байгаагаас бүтээгддэг оршихуйн өнгө юм." хэмээжээ.