Л.Пүрэвбаатар эхнэрийнхээ компанийн хуучин машиныг байгууллагадаа “ШАХСАН“ гэв үү?
Авлигатай Тэмцэх газар өнгөрсөн долоо хоногт есөн хэргийг шүүхэд шилжүүлээд байна.
Тодруулбал, "Улаанбаатар төмөр зам” ХНН-ийн дарга асан Л.Пүрэвбаатар нь бүрэн эрх, албан тушаалын байдлаа урвуулан ашиглаж өөртөө давуу байдал бий болгож 2015 оны нэгдүгээр сарын 23-ны өдөр өөрийн эхнэрийн захирлаар нь ажилладаг “Нимонс” ХХК-ийн эзэмшлийн 00-36 УНТ улсын дугаартай хуучин Лексус 570 маркийн суудлын автомашиныг Б.Энх-Амгалангийн нэрээр УБТЗ ХНН-т 153 сая төгрөгөөр “худалдах, худалдан авах” тухай гэрээ байгуулж мөнгийг шилжүүлж нийгэмлэгт их хэмжээний хохирол учруулсан гэх үндэслэлээр хэргийг шүүхэд шилжүүлээд байгаа аж.
Л.Пүрэвбаатар нь УБТЗ-ын даргаар хоёр жил ажиллахдаа "УБТЗ" ХНН-ын хөрөнгөөр хувьдаа Зайсанд 1.4 тэрбум төгрөгийн үнэтэй таунхаус захиалан бариулж эзэмшиж байгааг "УБТЗ" ХНН-ийн ажилчид хууль бус үйлдэл хэмээн шүүхэд хандсанаар гурван шатны шүүхээс хаусийг чөлөөлөх шийдвэр гараж, албадан чөлөөлж нэхэмжлэлийг хангасан билээ.