Arslan.mn

Эрүүл мэндийн яамнаас өнөөдөр өгсөн мэдээллээр манай улсын коронавирусийн халдвар авсан нийт тохиолдлын тоо нэгээр нэмэгдэж, 38 болсон. Үүнээс бүрэн эдгэрсэн ес, ХӨСҮТ-д 29 хүн хяналтад байна. Хоёр өдөр бүртгэгдсэн 37, 38 дахь тохиолдлууд нь ОХУ-аас эх орондоо ирсэн оюутнуудаас илэрсэн. Ингэхдээ тусгаарлалтын 13, 14 дэх хоногийн гурав дахь давтан шинжилгээгээр коронавирус илэрсэн.

ОХУ-аас Улаан-Үдээр дамжин ирсэн оюутнуудын  заримынх нь амьдарч байсан оюутны байранд халдвар тархсан байжээ. Тиймээс 32 оюутныг халдвар авсан байх эрсдэлтэй гэж үзээд ганц ганцаар нь нэг өрөөнд ХӨСҮТ-д тусгаарласан байна. Эдгээр оюутнуудаас өнөөдрийн байдлаар 21 нь коронавирусийн халдвар авсан нь батлагдаад байгаа юм.

Тэгвэл өнөөдөр Эрүүл мэндийн сайд Д.Сарангэрэл нүүр хуудсандаа ес дэх өвчтөн эдгэрсэн тухай мэдээлэв.

Тэрээр "ХӨСҮТ-ийн хамт олон коронавирусын халдвартай бас нэгэн өвчтнөө эдгээж, 14 хоногийн хяналтад сувилал руу шилжүүллээ. Энэ маань оюутан хүүхэд байгаа юм. Одоо ХӨСҮТ-ийнхэн маань бүх хүнээ хувийн хамгаалах хэрэгсэл өмсөж тайлах сургуулилтаа үргэлжлүүлэн хийж байна" гэж бичжээ.