Arslan.mn

Нийт найман эмэгтэй дагагчаа олон удаа хүчиндэж байсан шашны урсгалын тэргүүнд Өмнөд Солонгосын шүүх өнөөдөр 15 жилийн хорих ял оноожээ.

Технологийн өндөр хөгжилтэй тус улсын хүн амын 44 хувь нь өөрийгөө сүсэг бишрэлтэй гэж үздэг гэсэн тоо бий. Тэдний ихэнх нь уламжлалт шашны сүм хийдүүдэд харьяалагдаж, орлогынхоо 10 хувийг хандивладаг байна.

Нөгөө талд нь өөрийн гэсэн шашны шинэ урсгал номлолыг бий болгож, өөрийгөө тэргүүнд нь залсан 60 орчим хүн байдаг ажээ. Тэдний зарим нь луйвар, тархи угаалт, залилан мэхлэлт явуулсан хэрэгт үе үе нэр холбогдож байдаг.

Өнөөдөр ял сонссон Ли Жэйрок нь Сөүлийн ядуу дүүрэгт 1982 онд Манмин нэртэй сүм байгуулж байжээ. Эхлэхдээ 12 дагагчтай байсан тэр өнөөдөр 130,000 бишрэгчтэй болж өргөжсөн байна.

Энэ оны эхээр Өмнөд Солонгост #MeToo хөдөлгөөн өрнөж эхлэхэд Ли багшийн гурван шавь удаа дараа хүчиндүүлж байснаа анх удаа дэлгэсэн юм.

Өөрийгөө “амьд Бурхан” гэж өргөмжилдөг багшийнхаа халдлагыг эсэргүүцэж чаддаггүй байснаа тэд хэвлэлд ярьсан байна.

Ингээд нийт найман эмэгтэй дагагч шүүхэд гомдол гаргаж, урт хугацааны турш тус бүр олон арван удаа хүчиндүүлж байснаа дэлгэжээ.

Одоо 75 настай Лигийн өмгөөлөгч гомдол гаргасан эмэгтэйчүүдийг шашны номлолоо зөрчиж шийтгүүлсэндээ өширхөн багшийгаа гүтгэж байна гэж тайлбарласан байна.

Гэвч Сөүл хотын төв тойргийн шүүх Ли Жэйрокыг буруутай гэж үзэн 15 жил шоронд хорих ял оноожээ. Засгийн газрын 2015 оны судалгааны дүнд өгүүлснээр Өмнөд Солонгосын иргэдийн 28 хувь нь Христийн сүм хийдүүдэд харьяалагддаг гэсэн бол 16 хувь нь өөрийгөө Буддист гэсэн байна.

Гэхдээ өөр эх сурвалжийн тооцоолсноор Христ шүтлэгтнүүдийн хоёр сая орчим нь ямар нэг гаж урсгал, номлолын дагагчид байдаг гэжээ.

Мөн 60 орчим хүн өөрийгөө Есүс Христийн дараа тодорсон бурхан гэж өргөмжилдөг байна.

Тэдний заримын номлол аюултай үр дүнд хүргэсэн тохиолдол бий. Тухайлбал 1987 онд Одэйян нэртэй дэлхийн сүйрлийг зөгнөдөг бүлгийн 32 гишүүн тэргүүнийхээ хамт амиа хорлосон байдалтай олдож байжээ. Тус бүлгийн тэргүүн гэмт хэрэгт сэжиглэгдэж, цагдаад шалгагдаж байсан гэдэг.

Өнгөрсөн онд албан тушаалаасаа огцорсон Өмнөд Солонгосын анхны эмэгтэй ерөнхийлөгч Пак Гын Хэгийн дотны найз Чой Сүүн Сил нь шашны шинэ урсгалын тэргүүн Чой Тэй Миний охин байсан юм.

Эцэг Чой нь  Буддизм, Христ, бөө мөргөлийн холимог номлолтой Ёнсэгё нэртэй сүмийг байгуулж, залуу Пак Гын Хэгийн оюун санаанд нөлөөлж байсан гэлцдэг.

Эх сурвалж: AFP