Arslan.mn

Монгол Улс түүхэндээ анх удаа бүх нийтийн бэлэн байдлын зэрэг буюу хатуу хөл хориог хэд хэдэн удаа тогтоолоо. Бид урьд өмнө нь учирч байгаагүй, үзэж туулаагүй шинэ нөхцөл байдалтай нүүр туулж ажиллалаа. Мөн өнөөдрөөс эхлэн Улаанбаатар хотод тогтоосон Бүх нийтийн бэлэн байдлын зэргийг бууруулж байгаа. 

Өнгөрсөн хугацаанд эмч, цагдаа, цэрэг, онцгойгийнхон өндөржүүлсэн бэлэн байдалд иргэдийнхээ эрүүл мэнд, улс орныхоо аюулгүй байдлын төлөө унтах нойроо хугаслан, идэх хоолоо хагаслан, үр хүүхэд, аав, ээж, хань ижилтэйгээ хамт байх эрхээсээ татгалзан ажиллалаа. Мэдээж, энэ бол тэдний сонгосон мэргэжил, тангараг өргөсөн ажил. Гэхдээ энэ нь бас тэдэнд талархлаа илэрхийлэхгүй байж болно гэсэн үг биш.

Тэр дундаа "Ковид-19" цар тахлын голомтыг дотооддоо хумихад цагдаа, дотоод цэргийн байгууллагын гүйцэтгэж буй үүрэг нэн чухал байлаа. Цагдаагийн алба хаагч нар бүрэн бүрэлдэхүүнээрээ ажиллаж, дотоодын цэрэг, ДХИС сонсогчид нийлсэн 6000 гаруй алба хаагч 24 цагийн үүрэг гүйцэтгэж, хацар хайрах, хөл дааруулах хүйтнийг үл хайхран халдвар авсан байж болзошгүй хүмүүсийг эрж, суран, иргэдийг хорио цээрийн дэглэм зөрчих вий, өвчин тусах эрсдэлд өртчих вий хэмээн хэв журам сахиулахаар хоолтой, хоолгүй, нойртой, нойргүй, хөдөлгөөнт болон явган эргүүлийн үүрэг гүйцэтгэлээ.  

Өндөржүүлсэн бэлэн байдлын үеэр дээд шатны байгууллага, удирдлагуудын зохион байгуулалт, шийдвэрээс болсон алдаа дутагдлууд гарсан нь үнэн. Гэхдээ цагдаа, дотоод цэргийн алба хаагч нар анхан шатандаа шийдвэрийг шуурхай биелүүлж, иргэдийн аюулгүй байдлын сахин хамгаалж ажилласанд  хэн ч эргэлзэхгүй биз.

Тэд цар тахлын эрсдэл, аюулыг сөрөн зогсохдоо, хайртай хүмүүсээ орхиод албандаа гарахдаа улсынхаа төлөө өргөсөн тангарагтаа үнэнч зогсов.  Тиймээс ч чимээгүй баатрууд болох тэдэнд ард иргэдийн зүгээс талархаж буйгаа илэрхийлсээр байна.