М.Мөнхшүр: Орхон аймгийн Цэргийн штабын дарга буудуулж амиа алдсан эсэхийг шалгаж байна
Архангай аймгийн Өгийнуур суманд 12 хүн түлэгдэж нэг хүүхэд амиа алдсан болон Орхон аймгийн ЗДТГ-ын Цэргийн штабын дарга өөрийнхөө өрөөнд буудсан байдалтай олдсон хэргийн талаар Цагдаагийн ерөнхий газраас мэдээлэл хийлээ.
Өчигдөр Орхон аймгийн Засаг даргын Тамгын газрын Цэргийн штабын дарга Б аймгийн захиргааны байрандаа өөрийнхөө өрөөнд буудсан байдалтай олдсон. Хэргийн шалтгаан нөхцөлийг тогтоохоор цагдаагийн байгууллага шалгаж байгаа юм байна. Тэрбээр, 2002-2019 он хүртэл ЗДТГ-ын Цэргийн штабт Нөхөн хангалт, тоо бүртгэлийн офицерын албыг хашиж байгаад зургаадугаар сараас Цэргийн штабын даргын албанд томилогдон ажиллаж байжээ.
Харин Архангай аймгийн төвөөс зүүн урд зүгт 200 километрийн зайд орших Өгийнуур сумын Орхон багийн “Өгий” нуурын “Урд мэргэн шанаа” гэдэг газар иргэн Б-гийн түрээслүүлдэг байшин шатсаны улмаас 12 хүн гэмтэж, нэг хүүхэд амиа алдсан хэргийн тухайд мөн цагдаагийн байгууллага шалтгаан нөхцөлийг тогтоохоор ажиллаж байгаа юм байна.
Уг байшинд Булган аймгаас Налайх дүүрэг рүү явах замдаа нийт 15 хүн амарч байсан аж. Гэмтсэн 12 иргэнийг сумын эмнэлэгт хэвтүүлэн эмчилж байгаад өчигдөр 13.33 цагаас 18.20 цагийн хооронд Зэвсэгт Хүчний 303 дугаар ангийн “МИ-171Е” загварын нисдэг тэргээр иргэдийг тээвэрлэн ГССҮТ-д хүргэжээ. Харин иргэн О, Х нарыг ар гэрийнх нь хүмүүс автомашинаар тээвэрлэн мөн Улаанбаатарт авч ирсэн байна. Урьдчилсан байдлаар уг гал түймрийн шалтгаан нөхцөл нь ахуйн газыг буруу ашигласнаас болсон талаар албан хүмүүс мэдээллээ.