Arslan.mn

Агаарын бохирдол бол Улаанбаатар хотод тулгамдаж буй хамгийн том асуудлын нэг юм. Тэгвэл агаарын бохирдлыг ашиглаж дугуйн зам тавьж болох шийдлийг Дугаржа хэмээх залуу олсон байна. 

Цахилгаан станцаас гарч буй шатаасан нүүрсний тортог болон утааг ашиглан Улаанбаатар хотын ойролцоо 50 километр унадаг дугуйн зам барих төсөл хэрэгжиж эхэлсэн бөгөөд төслийг танилцуулах арга хэмжээ өнөөдөр боллоо.

Тус санаачилгыг Япон улсад амьдардаг, Өвөр Монгол Мүнэёши Дугаржа хэмээх залуу санаачилж эхлүүлсэн бөгөөд "Dotexe Mongolia" төсөл болон Япон улсын "Rebirth Technology" компани санхүүжүүлэн ажиллах аж.

Улаанбаатарын агаарын бохирдлын талаарх мэдээ мэдээллийг байнга авч, сэтгэл зовнин, эмзэглэдэг М.Дугаржа хотын агаар, орчны бохирдлыг бууруулахаас гадна байгаль орчинд ээлтэй шийдэл хайж, түүний олсон санаа өнөөдөр ийнхүү ажил хэрэг болж байна.

"Dotexe Mongolia" төсөл нь хот болон суурин газрын агаарын бохирдлыг бууруулах зорилготой төсөл ба байгаль орчин, экологийн тулгамдсан асуудлыг шийдвэрлэхдээ үр дүнтэй, хямд өртөг бүхий санаачилгыг дэмжих замаар бүх нийтийг оролцуулахыг зорин ажилладаг байна.