СЭРЭМЖЛҮҮЛЭГ: Фэйсбүүкээр тарсан сонжоонууд хувийн мэдээлэл хуулдаг цахим залилан юм
Чингэлтэй дүүрэг дэх Цагдаагийн нэгдүгээр хэлтэс өөрийн цахим хаягаар дамжуулан иргэдэд сэрэмжлүүлэг мэдээлэл тараалаа. Энэхүү сэрэмжлүүлэгт “FACEBOOK-т “Хэдэн хүүхэдтэй болох вэ”, “Урьд насандаа хэн байсан бэ”, “Таны эсрэг хүйстний хувилбар…” гэх мэт линк дээр дарж өөрийнхөө болон бусдын тухай хөгжилтэй зураг, мэдээ харж байсан уу? Хэн нэгний тухай шар мэдээ, нийгэмд түгж буй онцлох мэдээллийг коммент дээрх линкээр дарж уншина уу? гэсэн линк таныг фэйсбүүкээ нээхэд хэр их харагдаж байна? Энэ бүгд таны мэдээллийг хуулж авахаар зориулагдсан цахим залилангийн нэг хэлбэр юм. Та уг линк дээр дарснаар таны мэдээлэл автоматаар хуулагдан хор, хохирол нь шууд ажиглагдахгүй байж болох ч таныг анзаараагүй байхад л таны цахим хаягаар хуурамч мэдээлэл түгээх, та цахим хаяггүй болох гэх мэт олон эрсдлийг дагуулах болно. Тиймээс сонирхолтой санагдсан линк болгон дээр дарахаас зайлсхийнэ үү” гэжээ.