Arslan.mn

Халдашгүй байдлын дэд хороо хуралдлаа. Хуралдаанаар УИХ-ын гишүүдийн бүрэн эрхийг түдгэлзүүлэх асуудлыг хэлэлцсэн юм. Ерөнхий прокуророос УИХ-ын гишүүн Б.Ундармаа, Д.Дамба-Очир, Л.Энхболд, Г.Солтан нарын бүрэн эрхийг түдгэлзүүлэх хүсэлтийг УИХ-д өргөн барьсан. Үүнтэй холбогдуулан Халдашгүй байдлын дэд хороо хуралдаж, дүгнэлт гаргалаа. 

Халдашгүй байдлын дэд хорооны дарга Ц.Нямдорж:

Халдашгүй байдлын дэд хороо хуралдаж, УИХ-ын гишүүдийн бүрэн эрхийг түдгэлзүүлэх асуудлыг хэлэлцлээ. Бүрэн эрхийг нь түдгэлзүүлэх хүсэлт гаргасан Ерөнхий прокурор болон гишүүдийн тайлбарыг сонслоо.

Ерөнхий байдлыг авч үзвэл нэгдүгээрт шалгалт дуусаагүй байгаа. Дуусах төгсгөлийн шатандаа орж байгаа гэж Ерөнхий прокурор танилцуулсан. Ийм учраас мөрдөн байцаах байгууллага шалгалтаа дуустал УИХ-ын гишүүнийг түдгэлзүүлэх асуудлыг шийдвэрлэх бололцоогүй гэж үзэж байна. ЖДҮХС-гийн зээлтэй холбоотой асуудлаа буруутай, буруугүйг шийдээд, гарцаагүй гэж үзсэн асуудал байвал оруулж ир.

Тэрбээр "Г.Солтан гишүүн өнөөдөр онгоцоор ирж тайлбар өгсөн. Ингээд байнгын хороод, Их хуралд оруулах санал дүгнэлтийг танилцуулж байна. Ерөнхий прокурор М.Энх-Амгалан шалгалт дуусаагүй төгсгөлийн шатандаа орж байна гэж танилцуулсан. Ийм учраас шалгалт дуустал гишүүдийн түдгэлзүүлэх асуудлыг шийдвэрлэх боломжгүй гэж үзэж байна. 

Ерөнхий прокурорын нэмж өгсөн тайлбар, гишүүдийн тайлбараас үзэхэд цаашаа нэмж тодруулж, нэг мөр болгох асуудал цөөнгүй байна.

Дөрвөн гишүүн тус бүрдээ нэг удаа АТГ-т очиж мэдүүлэг өгсөн. Шалгалтын ажиллагаанд саад учруулсан зүйл байхгүй юм билээ. Тиймээс энэ удаад дөрвөн гишүүнийг түдгэлзүүлэх асуудлыг Их хуралд оруулах шаардлагагүй гэж үзсэн" гэлээ.