Өнгөрсөн долоо хоногт Уул уурхайн салбарт Хэн, Юу хэлсэн талаар хүргэж байна. /2014.07.21-2014.07.29/

Уул уурхайн дэд сайд О.Эрдэнэбулган: Хүрэн нүүрснээс жилд 15 тэрбум шоо метр байгалийн хий боловсруулна

Ашигт малтмалын тухай хуульд нэмэлт өөрчлөлт оруулах хуулийг баталсантай холбоотойгоор энэ салбарт үйл ажиллагаа явуулж байгаа аж ахуйн нэгж байгууллага, хөрөнгө оруулагчид хөдөлгөөнд орж байна. Одоо манай яам мөрдөх үйл ажиллагааны журмыг Засгийн газраар батлуулахаар ажиллаж байна. Хятадын Синофек гэдэг корпорацитай хамтран Монгол улсад элбэг байдаг хүрэн нүүрсийг боловсруулж, байгалийн хий гаргах төслийг хэрэгжүүлэхээр болсон. Эл төслийг урьчилсан ТЭЗҮ-г хүлээн авсан. Жилд 80 сая хүрэн нүүрсийг боловсруулж 15 тэрбум шоо метр байгалийн хийг боловсруулна гэж тооцсон. / Үндэсний шуудан 2014.07.28 /

УИХ-ын байнгын хорооны дарга Ц.Даваасүрэн: 106 лицензийг хямрал далимдуулж сэргээлээ

Эрх баригч намынхан эдийн засгийн хямралыг далимдуулж энэ хуульд нэмэлт өөрчлөлт оруулсан шүү дээ. Оюутолгой, Тавантолгойгоос ашгаа аваагүй байж дахиад лиценз олгох ямар шаардлага байна. Миний хувьд энэ хуулийг анхнаасаа дэмжээгүй. Ийм хууль гаргаснаараа валютын ханш сайжраагүй, эдийн засаг ч дээрдэхгүй шүү. Яагаад гэвэл энэ чинь өөрөө лобби хууль байсан байхгүй юу. / Зууны мэдээ 2014.07.28/

Монголын экспортлогчдын холбооны ерөнхийлөгч Д.Галсандорж: Зэсийн экспортын орлого хоёр дахин нэмэгдсэн ч нүүрснийх ихээхэн унасан

Нүүрснээс гадна төмрийн экспортын үнэ 20 орчим хувиар буурсан. Зэс, цайрын үнэ олон улсын зах зээлд өсөж байгаа. Зэсийн баяжмалын үнэ өнгөрсөн оныхоос 18, цайрынх 10 гаруй хувиар нэмэгдсэн байна./ Өнөөдөр 2014.07.24/

Зэсийн үнэ энэ онд 7000 ам.доллараас буухгүй

Манай холбоо олон улсын зэсийн зах зээлийн судалгааны компаниудтай хамтран ажилладаг. Олон улсын томоохон байгууллагуудын прогнозыг харахад энэ онд 7000 ам.долларын түвшинд байх нь бараг тодорхой болсон./ Өдрийн сонин 2014.07.29/

"Эрдэнэс-Тавантолгой" ХК-ийн гүйцэтгэх захирал Я.Батсуурь: Манай компани Монголд анх удаа нүүрсний давхарга метан хийг БНСУ-тай хамтран ашиглана

Эдийн засгийн нөхцөл байдал, тэр дундаа нүүрсний зах зээлийн таагүй байдал нүүрлээд байгаа өнөө үед Эрдэнэс Таван толгой ХК-ийн ашигт ажиллагаагаа сайжруулах бүхий л арга хэмжээг авч ажиллаж байна. Хэрхэн зардлыг бууруулах вэ, борлуулж буй үнийг яаж өндрөөр тогтоох вэ гэдэгт гол анхаарлаа хандуулж байна. "Эрдэнэс-Тавантолгой" ХК-ийн нүүрсний уурхайн метан хийг ашиглах төсөл хэрэгжүүлэхээр ажлаа эхлүүлээд байна. Ингэснээр манай компани Монголд анх удаа нүүрсний давхарга метан хийг БНСУ-тай хамтран ашиглана. / Өдрийн сонин 2014.07.29/

Сэтгүүлч Н.Гэрэл: Яамдыг цөөлөх нөөц төлөвлөгөөг нууц хийж байна

Одоо мөрдөж буй Засгийн газрын бүтцийн тухай хуулийн нэгдүгээр зүйлд Монгол улсын Засгийн газрын бүтцэд ерөнхий чиг үүргийн байгаль орчин, ногоон хөгжлийн яам, Сангийн яам, Хууль зүйн яам, чиглэлийн Барилга хот байгуулалтын яам, Батлан хамгаалах яам, Боловсрол, Шинжлэх ухааны яам, Зам тээврийн яам, Соёл, спорт аялал жуулчлалын яам, Уул уурхайн яам, Үйлдвэр хөдөө аж ахуйн яам, Хөдөлмөрийн яам, нийгмийн хамгаалалтын яам, Эдийн засаг хөгжлийн яам, Эрчим хүчний яам, Эрүүл мэндийн яам буюу нийтдээ 16 яамтай байхаар заасан. /Өдрийн шуудан 2014.07.23 /

Сэтгүүлч Б.Номин: "Сегтерра Гоулд"-ын гацуурт дахь алтны ордыг ашиглах төслийг эхлүүлэх санал тавив

Л.Болд, Жон Бэйрд нар Монгол Улсад үйл ажиллагаагаа явуулж буй Канадын комданийн төлөөлөлтөй дугуй ширээний уулзалт хийв. Уулзалтанд Уул уурхайн дэд сайд О.Эрдэнэбулган, Хууль зүйн яамны төрийн нарийн бичгийн дарга Ц.Баярцэцэг анрын холбогдох хүмүүсээс гадна "Оюутолгой", "Сентерра Гоулд", "Мажор дрилүлинг", "Кинкора" зэрэг компанийн төлөөлөгч нар оролцсон. /Өнөөдөр 2014.07.25 /