Arslan.mn

УИХ-ын чуулганы Баасан гарагийн хуралдаан эхэллээ. Чуулганы хуралдаанд Монгол Улсын Ерөнхийлөгч Х.Баттулга оролцож, үг хэлж байна. 2021 оны төсөв баталсантай холбоотойгоор Монгол Улсын Ерөнхийлөгч Х.Баттулга төсөвт бүхэлд нь хориг тавиад байгаа юм.

Харин чуулганы хуралдаанд Ерөнхийлөгч оролцож, өөрийн санаачилсан шүүхийн багц хуулийн шинэчлэлийг татан авч байгааг мэдэгдэв. 

Тэрбээр "Миний өргөн мэдүүлсэн шүүхийн багц хуулийн төслийг УИХ хэлэлцсэн мэт буцаахаар болсонтой холбогдуулан чуулганы хуралдаанд өөрийн биеэр оролцож байр сууриа илэрхийлж байна. Үндсэн хуулийн нэмэлт, өөрчлөлт өөрчлөлттэй холбоотой шүүхийн багц хуулийн шинэчлэлд хэт улстөржсөн, иргэд олон нийтийг төөрөгдүүлсэн, үндэсний эв нэгдлийг хангах төрийн үйл ажиллагааны үндсэн зарчмыг бүдүүлгээр зөрчсөн байдлаар хандаж байгаад харамсаж байна. УИХ-д өргөн мэдүүлсэн шүүхийн багц хуулийн төслөө эгүүлэн татаж байна. 

Шүүхийн шинэчлэл Үндсэн хуулийн нэмэлт, өөрчлөлт хэрэгжсэн өдрөөс эхэлсэн юм. Үндсэн хуульд шүүхийн шинэчлэлтэй холбоотой гурван заалт орсон. Үүний хоёрыг нь миний бие санаачилж, нэгийг нь зөвшөөрч дэмжсэнээр баталсан. Нийгмийн томоохон хэлэлцүүлэг, зөвшилцөл, ойлголцлын үр дүнд батлагдсаныг мартах загасны ой санамжтай хүн энэ танхимд байхгүй гэдэгт итгэж найдсаар байна. Шүүхийн нэр хүндийг шалдаа буулгасан асуудлыг өнгөрсөн хугацаанд бид ярьсан, хэлэлцсэн. Дүн өвлийн хүйтнээр таван гишүүн МАНАН дэглэмийг нураах, шударга ёсыг тогтоох хөдөлгөөн өрнүүлсэн. Эдгээр гишүүний зарим нь УИХ-ын дэд дарга, ЗГХЭГ-ын дарга, ХЗДХ-ийн сайдаар ажиллаж байна" гэв. 

ШУУД ҮЗЭХ:

Хуралдаанаар дараах асуудлыг хэлэлцэхээр товложээ.

• Монгол Улсын 2021 оны төсвийн тухай хууль баталсантай холбогдуулан авах арга хэмжээний тухай" Улсын Их Хурлын тогтоолын төсөл /эцсийн хэлэлцүүлэг/;
• Гаалийн албан татвараас чөлөөлөх тухай хуулийн төсөл /Засгийн газар 2020.11.20-ны өдөр өргөн мэдүүлсэн, хэлэлцэх эсэх/;
• Нэмэгдсэн өртгийн албан татвараас чөлөөлөх тухай хуулийн төсөл /Засгийн газар 2020.11.20-ны өдөр өргөн мэдүүлсэн, хэлэлцэх эсэх/;
• Монгол Улсын шүүхийн тухай хуулийн шинэчилсэн найруулгын төсөл болон хамт өргөн мэдүүлсэн хуулийн төслүүд /Монгол Улсын Ерөнхийлөгч 2020.04.23-ны өдөр өргөн мэдүүлсэн, хэлэлцэх эсэх/;
• Шүүгчийн эрх зүйн байдал, сахилга, хариуцлагын тухай хуулийн шинэчилсэн найруулгын төсөл болон хамт өргөн мэдүүлсэн хуулийн төслүүд /Монгол Улсын Ерөнхийлөгч 2020.04.23-ны өдөр өргөн мэдүүлсэн, хэлэлцэх эсэх/;
• Хуульчийн эрх зүйн байдлын тухай хуулийн шинэчилсэн найруулгын төсөл болон  хамт өргөн мэдүүлсэн хуулийн төслүүд /Монгол Улсын Ерөнхийлөгч 2020.04.23-ны өдөр өргөн мэдүүлсэн, хэлэлцэх эсэх/;
• Улсын Их Хурлын гишүүн Д.Бат-Эрдэнээс Монгол Улсын Ерөнхий сайдад хандан “Монгол Улсын хэмжээнд усны харилцааг зохицуулж буй хууль тогтоомжийн хэрэгжилтийн байдал, тэдгээрийн уялдаа холбооны талаар” тавьсан асуулгын хариу сонсох.