Arslan.mn

Монголын рок попын ертөнцийг гавьяат жүжигчин Б.Сарантуяа, Т.Ариунаа хоёргүйгээр төсөөлөхийн аргагүй. Үнэнч фэнүүд нь тэднийг цаг ямагт өрсөлдүүлсээр ирсэн гэж болно. Тэдний хувьд хоёрхон насны зөрүүтэй ч 30 гаруй жил урлагийн тайзыг эзэгнэж яваа уран бүтээлчид.

Тэд олон жилийн дараа уран бүтээлээрээ хамтран, сонсогч фенүүддээ бэлэг барихаар болжээ. Энэ талаар дуучин Т.Ариунаа өөрийн цахим хуудастаа “Дуучин Т.Ариунаа миний санаачилгаар Соёлын гавьяат зүтгэлтэн Л.Балхжав аялгууг нь бүтээж, Соёлын гавьяат зүтгэлтэн Ш.Гүрбазар яруу найргийг нь урлаж, “Үлэмж төгөлдөр” шинэхэн дуу төрлөө. Домогт Зууны манлай дуучин Б.Сарантуяатай хамтран анх удаа өөрсдийн соло чиглэлийн дуугаа та бүхэндээ тун удахгүй хүргэх гэж байна” гэжээ.

Дуучин Т.Ариунаагийн хувьд саяхан нөхрийн хамт шударга бус хууль, шүүхийн байгууллагын талаар сэтгүүлчдэд мэдээлэл хийсэн. Харин дуучин Б.Сарантуяагийн хувьд өөрийн уран бүтээлийн 23 дахь цомог болох 10 дуунаас бүрдсэн “Хайрын бурхан” өнгөт пянзныхаа баярыг аравдугаар сарын 2-нд хийхээр төлөвлөөд буй юм. Түүний шинэ пянз цуврал хэлбэрээр гарах аж.