Гурван настай хүүхдэд харгис хандсан сувилагчийг ажлаас нь халжээ

Хойд хөршийн Новосибирскийн Сүрьеэгийн эмнэлгийн сувилагч гурван настай бяцхан охиныг чирч гулдран, үснээс нь зулгааж, загнаж орон дээр нь гаргаад цохиж байгаа бичлэг цахимд тавигдсан билээ. Сувилагч эмэгтэйн үйлдэл олны эсэргүүцэлтэй тулгарсан юм.

Бяцхан охиныг загнаж, чирч орж ирэхийг харсан бас нэгэн охин айн зугтааж байгаа нь бичлэгээс харагдана. Уг бичлэгийг нэгэн өвчтөний ээж нь хийж, олон нийтийн сүлжээнд тавьжээ.

Олны эсэргүүцэл өрнөөд удаагүй байхад хүүхдэд харгис хандсан сувилагчийг ажлаас нь халж, шүүхийн шийдвэрээр 15 мянган рублиэр торгосон байна. Мөн сувилагчийг хүүхдийн хүчирхийллийн хэрэгт буруутган мөрдөн шалгах ажиллагааг Новосибирскийн Мөрдөн байцаах алба эхлүүлжээ.

Түүнчлэн Бүсийн прокурорын газраас тус эмнэлгийн дотоод үйл ажиллагаанд шалгалт хийхээр болсон байна. Шаардлагатай тохиолдолд холбогдох албан тушаалтанд хариуцлага хүлээлгэх аж.