Нүүр болон биен дээрх тод мэнгэнүүд тухайн хүний талаар сонирхолтой олон зүйлийг нэгэн зэрэг өгүүлдэг гэнэ. Эдгээр мэнгэн сахиус таны амжилтыг улам бататгах болно гэдгийг судлаачид хэлжээ.

Шанаан дээр

Хэрэв та шанаан дээрээ мэнгэтэй бол та "мөнхийн аялагч". Та ажил мэргэжилтэйгээ холбоотойгоор их аялдаг байж болно, мөн зүгээр л сонирхолдоо хөтлөгдөн аялж, шинэ зүйлсийг судалж мэдэх хүсэлтэй нэгэн байж ч мэдэх юм.

Хоёр хөмсөг хооронд

Хоёр хөмсөг хоорондоо мэнгэтэй хүн ажил мэргэжилдээ хурдацтай ахих боломжтой. Карьерын шатаар харьцангуй хурдан "алхах", цалингаа нэмүүлэх, эсвэл өөрийн дуртай ажил хөдөлмөрөө эрхэлж амжилт олох гээд аль нь ч байж болно. Хамгийн гол нь ажил мэргэжилдээ амжилт гаргах үндэс суурь нь танд байгалиас заяагдсан ажээ.

Хөмсөгний доор

Хэрэв таны хөмсөг болон нүдний хооронд мэнгэ бий бол, энэ таныг аливаа нөхцөл байдалд гайхалтай хурдан дасан зохицдог, бусадтай эв зүйгээ төвөггүй олдог нэгэн болохыг илтгэж байна. Та бол төрөлхийн "удирдан, манлайлагч". Бусад хүмүүс танд итгэж, өөрсдийг нь удирдан чиглүүлэх итгэл хүлээлгэх болно.

Уруулны дээр

Уруулан дээрээ мэнгэтэй хүмүүс бусдын хайрыг татахдаа чадварлаг төдийгүй, харьцангуй нээлттэй байдаг. Найз нөхөд дундаа хүндлэл хүлээсэн нэгэн. Мөн аливаа хоол, эд зүйл болон хүрээлэн буй бүх л зүйлсийн амт, чанарыг нэн тэргүүнд эрхэмлэдэг байна.

Хацар дээр

Хацар дээрээ мэнгэтэй хүмүүс баг хамт олон дунд хүндлэл хүлээсэн, төрөлхийн "хүчтэй" лидер. Мөн харьцангуй амжилттай байдаг буюу эд материалын хувьд ч баяжих магадлал өндөр байдаг гэнэ.

Гарын алган дээр

Алган дээрээ мэнгэтэй хүмүүс аливаа зүйлд тогтвортой байдлыг эрхэмлэгч. Санхүүгийн тогтворгүй байдал зэргээс зайлсхийлдэг, өөрөөр хэлбэл санхүү эдийн засгийн тал дээр сайтар тооцоотой байдаг.

Хөлийн улан дээр

Та хөлийн улан дээрээ мэнгэтэй бол та аливаа зүйлд "шинийг эрэлхийлэгч". Аль болох шинэ хүмүүстэй харилцаа холбоо тогтоож, танилын хүрээгээ тэлэх, шинэ газарт очиж үзэн, шинэ хоол амтлах дуртай нэгэн. Ийм мэнгэтэй хүмүүс ихэвчлэн нэр алдарт хүрч, бусдыг хойноосоо дагуулдаг.

Эх сурвалж: Times.mn