Arslan.mn

Монголын хөрөнгийн биржид бүртгэлтэй 219 хувьцаат компаниас 26 нь энэ онд үйл ажиллагааны цэвэр ашгаасаа хувьцаа эзэмшигчиддээ ногдол ашиг олгохоор шийдвэрлэсэн.

Дүнг нэгтгэж харвал, 69.5 гаруй тэрбум төгрөгийн ногдол ашиг олгох бөгөөд энэ нь өмнөх оны үзүүлэлтээс 4.4 дахин өссөн үзүүлэлт юм.

Монголын хөрөнгийн биржид бүртгэлтэй 11 хувьцаат компани ногдол ашгаа аль хэдийн тараасан буюу ойролцоогоор 59.5 тэрбум төгрөгийг хувьцаа эзэмшигчдийнхээ дансанд байршуулжээ.

Харин 15 ХК 10 орчим тэрбум төгрөгийн ногдол ашиг хуваарилахаар хүлээгдэж байгаа юм. Нэгж хувьцаандаа "Зоос гоёл" компани хамгийн өндөр буюу 6000 төгрөгийн ногдол ашиг олгох бол "Жуулчин Дюти Фрий" компани 5000 төгрөгийн, "Гутал" компани 3175 төгрөгийн ногдол ашгаар удаалж байна. Харин "Таван толгой" компани 45.92 тэрбум төгрөгийн ногдол ашиг олгосон нь нийт ногдол ашгийн 65.7 хувийг бүрдүүлж байгаа юм. Мөн "Мик Холдинг" компани 9.77 тэрбум төгрөгийн, "Гутал" компани 5.14 тэрбум төгрөгийн ногдол ашгаар тус тус удаалж байна.